Corte Comun di Husticia di Aruba, Corsou y Sint Maarten y di Boneiro, Sint Eustatius y Saba (Corte), a presenta su Relato Anual pa aña 2017 na prensa diaranson 23 di mei. E aña aki Corte ta ofrece publico en general un relato anual interactivo. E edicion aki ta special pa motibo cu banda di e entrevistanan skirbi, locual ta usual, tambe por mira e imagennan di video di e entrevistanan aki. Tema di e Relato Anual di 2017 ta: ‘Resistencia’. Consecuencianan di horcan Irma y esfuerso di coleganan di Corte pa sigui garantisa hurisprudencia, a pesar di e circunstancianan sumamente dificil. P’esey esaki tabata e inspiracion pa duna e Relato anual di aña 2017 e tema aki.
Personal di Corte
Na 2017 a bin cambio den composicion di e cuerpo di maneho di Corte. Eunice Saleh, kende tabata vice-presidente di e oficinanan na Corsou y Boneiro a keda nombra como presidente. Peter Lemaire a asumi e funcion di vice-presidente di e oficina na Sint Maarten, despues di a ocupa e mesun funcion na e oficina na Aruba pa algun aña. Algun miembro nobo a keda nombra den e cuerpo di maneho. Esakinan ta: Mauritsz de Kort como vice-presidente di e oficinanan na Corsou y Boneiro, Jaap Sap como vice-presidente di e oficina na Aruba y Coryse Barendregt, kende tabata manager di e oficina na Corsou, a keda nombra como director di operacion. Den e relato anual di 2017, miembronan di e cuerpo di maneho ta refleha riba nan experiencia durante e prome aña den nan funcion nobo.
E Relato Anual di aña 2017 ta brinda e posibilidad pa sera conoci cu algun ‘Personal di Corte’, pa medio di imagennan di video di e entrevistanan sosteni. Por haña un bista di experiencianan di un “raio” (“rechterlijke ambtenaar in opleiding”: funcionario hudicial den training), den su training pa bira hues. Banda di esaki dos hues ta splica algun caso bastante impactante di Aruba (Lunah) y Corsou (casonan moral). Tambe por sera conoci cu dos colega, cu hunto tin mas di 60 aña di servicio na Corte, den e capitulo ‘Personal di Corte’. Finalmente nos ta mira bek riba horcan Irma, hunto cu un colega cu a experencia e horcan. E ta e ultimo persona cu a bandona nos edificio monumental “Courthouse” na Sint Maarten y alabes e prome cu a bay tuma nota di e daño ocasiona, na momento cu Irma a caba di pasa. Den un entrevista conmovedor, e ta describi su experiencianan, su sentimentonan y con e, como griffier di vice-presidente di e oficina na Sint Maarten, a tuma parti na e prome sesionnan di Corte den prizon, algun dia despues cu e horcan a caba di pasa ariba Sint Maarten.
Huesnan local
Den 2017 a continua cu e maneho di Corte pa atrae mas hues local. E proceso di seleccion, cu a start den 2017, tabatin como resultado cu un candidato di Aruba a cuminsa su training pa bira hues na 2018 na Corsou. Den 2017 a yena en total 6 espacio pa training den e trayectonan “rio” (“rechter in opleiding”: hues den training) y “raio”. Dos candidato den training a bay Hulanda na 2017 pa finalisa e ultimo fase di nan training.
Cantidad di caso
Na aña 2017 a entrega un total di 44.067 caso na e Cortenan di Prome Instancia. Na Aruba a drenta 11.427 caso, Corsou 26.105, Sint Maarten 4.499 y BES 2.036. Na 2016 a entrega un total di 37.510 caso, pues, tabatin un crecemento di 17%. Principalmente e subida di 24% di casonan penal a atribui na e subida aki. Na 2017 a procesa 22% mas caso, den comparacion cu 2016. E subida mas substancial (65%) ta den Derecho administrativo (casonan di belasting) na tur oficina. E subida ta consecuencia directo di e cantidad di casonan pa aña na e diferente oficinanan.
E totalidad di casonan den apelacion cu a entrega a baha cu mas o menos 8%, di 811 den 2016 pa 743 den 2017. Por observa e bahada aki principalmente den casonan civil (-16%) y casonan di ambtenaar (-9%). Esaki ta un nota positivo, ya cu e cantidad di casonan, di e categoria aki, conclui den prome instancia ta mustra hustamente un subida. Esaki ta implica cu e persona cu tabata busca su derecho aña pasa, tabatin menos biaha un motibo pa apela toch, despues di e veredicto den prome instancia.
Realisacion di Plan anual 2017
E plan anual di 2017 ta haci mencion di e intencion di Corte su cuerpo di maneho pa pone enfasis riba profesionalismo y un operacion mas comercial. Den e Relato anual di 2017, Corte ta mira bek riba e proyectonan plania y ta amplia ariba algun di nan. E proyectonan ta keda categorisa den cuater tema central: mehora accesibilidad na hurisprudencia, salvaguardia confiansa di e ciudadano den hurisprudencia, stimula profesionalismo y calidad y finalmente, mehora servicio na cliente. Ta menciona si e proyecto a logra, si ta continua cun’e den 2018 of ta sigui cun’e mas den futuro. A dedica extra atencion na entre otro GEAR (un sistema di registro di caso desaroya door di Corte, cu mester soru pa casonan cu drenta keda procesa di forma mas eficiente), haci procesonan di trabou LEAN (“Leren Echt Anders Denken”: siña pensa diferente di berdad) y minimalisa desperdicio y e alohamento di e oficinanan na islanan BES y Sint Maarten.
Finanza
Corte a sera e aña financiero cu un perdida di f 1,503 miyon. Pa un parti hopi importante esaki ta consecuencia di inversionnan necesario den digitalisacion y automatisacion (sistema pa registro di caso GEAR) di Corte, preparacion di un provision en conexion cu miembronan di personal cu tabata malo pa largo tempo y dianan di vakantie no-tuma, pa asina keda garantisa continuidad di hurisprudencia y tambe e gastonan adicional debi na horcan Irma na Sint Maarten. Gastonan extra debi na posibilidadnan limita di biahe, organisacion di un conferencia internacional y limpiamento di e archiefnan na e oficinanan di Aruba y Corsou tambe a contribui na esaki. Lo acapara e contratiempo aki for di Corte su Capital Propio.
Un y tur por lesa y wak e Relato anual 2017 digital y interactivo di Corte. Link: https://indd.adobe.com/view/cf3b9619-39b0-4722-b825-51c3cf26b4c9