Corte ta drenta scolnan den ‘Siman di hurisdiccion’

Den e siman di 22 pa 26 di october 2018 Corte di Prome Instancia di Aruba (GEA) ta organisa ‘Siman di Hurisdiccion’ (Week van de rechtspraak). E aña aki GEA Aruba ta scoge pa bai pafo di Corte pa duna informacion tocante su organisacion. Den e siman aki huesnan ta bai bishita scolnan secundario. Durante di e bishita e huesnan, huntu ku un griffier di Corte, ta bai duna e alumnonan informacion entre otro tocante e trabou di hues, di Corte di Husticia y leynan.

Huesnan lo bishita nuebe scol secundario: Colegio Arubano San Nicolas, Juliana School, Colegio San Antonio, Colegio Arubano Oranjestad, De Schakel, Mon Plaisir College, Filomena College, Maria College y EPB Hato.

Otro actividadnan den Siman di Hurisdiccion
Den cuadro di e Siman di Hurisdiccion tambe lo tin algun actividad mas. Lo bai tin intercambio cu Jeugd Parlement di Aruba dialuna merdia 22 di october 2018 caminda e hobennan lo combersa cu presidente di Corte y director bedrijfsvoering di Corte Comun di Husticia (cu GEA Aruba ta forma parti di dje).

Diamars 23 di october 2018 pa 7:20 am Hits 100 FM ta transmiti un entrevista cu mr. Jane Jansen den e programa Entrevista di Dia. Mr. Jansen a caba di finalisa su studio pa bira hues na Aruba.

Tambe tin un workshop pa miembronan di prensa tocante proceduranan den Corte diaranson merdia 24 di october 2018.

Huesnan ta contesta pregunta riba Facebook
Algun siman pasa a duna e oportunidad pa haci pregunta na un hues riba pagina di Facebook di GEA Aruba. Nos a haya hopi reaccion. A haci un seleccion di diesdos pregunta y a laga presidente di Corte mr. Eunice Saleh, vicepresidente di Corte di Aruba mr. Jaap Sap y hues mr. Debby Angela contesta e preguntanan. Durante di e Siman di Hurisdiccion lo pone e videonan riba nos pagina di Facebook (Gerecht in Eerste Aanleg Aruba).

Comments

comments