CUPERTINO, California – Corte Supremo di Merca a dicta diamars na fabor di e compania Samsung, exigiendo e empresa Sur Coreano pa paga 399 miyon di dollar na Apple, kende ta acusa nan di a plagia parti di su componentenan pa telefonnan celular.
Huesnan a desestima e demanda di Apple, cu a sigura cu Samsung a obtene beneficionan pa copia partinan di e diseño patenta di su iPhonenan, pero corte a considera cu e empresa Sur Coreano no mester paga e beneficionan obteni di su 11 modelonan di telefon pasobra e presunto plagio solamente ta responde na un parti hopi chikito di e dispositivonan.
E caso awo ta bolbe na e hurisdiccion inferior pa sigui cu e disputa.
Samsung y Apple, cu sede na Cupertino, California, ta mantene desde 2011 un bataya hudicial pa patentenan di e telefonnan celular cu a hibanan na tribunalnan rond mundo y a pone nan gasta miyones di dollar.
E compania di Apple a demanda Samsung na 2011 pa a plagia e apariencia di su dispositivonan mobil y na 2012, un hurado federal a duna Apple rason, na sigura cu su rival a copia e diseño di algun dispositivo pa saca for di mercado e modelonan manera Galaxy SII.
Samsung ta wordo acusa di a horta tres caracteristica patenta: e aspecto rondo na e skinanan di iPhone, e diseño bisel cu ta wanta e pantaya na e resto di telefon y e disposicio di e iconnan colorido di e aplicacionnan den e pantaya di celular.
Como resultado di e litigio, un tribunal a ordena Samsung pa paga Apple un indemnisacion di 930 miyon di dollar.
Samsung ya a paga Apple mas di 548 miyon di dollar na December 2015 y awo e ta purbando pa e Tribunal Supremo permiti nan evita e pago di otro 390 miyon di dollar, cu ta e suma di e beneficionan cu e compania Sur Coreano a logra cu 11 modelo di celular supuestamente similar na Apple.
E multa contra Samsung a wordo stipula na 2012 pa un hurado, un forma caminda cu e ciudadanonan ta administra husticia y cu diamars algun hues di e Tribunal Supremo a cuestiona na duda pa e ta e mihor forma pa dirigi un caso asina tecnico y centra den diseño di telefonnan celular.
Den 120 aña e Tribunal Supremo no a studia un caso di patente y e ultimo biaha cu a haci’e tabata den e decada di 1870 pa media den un disputa riba e diseño di stam di un cuchara.
Fuente: NTN24