Diabierna mainta Corte Superior a condena e homber Nini Fonseca di 47 aña na un castigo di 26 aña di prizon, pa su envolvimento den e asesinato premedita di e politico yiu di Corsou, Helmin Wiels. Esaki ta un aña mas di locual Corte den Prome Instancia a dun’e.
Esaki ta motibo tambe cu Hof a tuma otro pruebanan na consideracion. E prome sentencia a keda destrui. Hof a bisa cu su tarea ta pa esclarece e hecho y circumstancianan rond di e asesinato di Wiels, mas cu den otro casonan, ta exigi hopi cautela.
Motibo di esaki ta cu di e tres personanan responsabel pa esaki, un di nan a wordo asesina (Raul Martinez, alias “Bolle”), un a comete suicidio (Luigi Florentina, conoci como Pretu) y e di tres (Elvis Kuwas, conoci como Monster) den transcurso di tempo a haci diferente declaracion of ta cambia su declaracionnan.
P’esey Hof a dicidi cu e di tres persona aki, Kuwas, mester wordo scucha durante tratamento di e caso den apelacion. Esaki a tuma luga. E interrogacion aki a wordo graba, pa despues transcribi literalmente pa yega un analisis optimal di e confiabilidad di tur su declaracionnan.
A base di e analisis aki, Hof a yega na e conclusion cu e pruebanan selecciona ta confiabel y uzabel como prueba den e caso. E pruebanan ta basa principalmente riba 4 punto: e declaracionnan di Kuwas, un declaracion di e ex Hefe di Siguridad Nacional di Corsou cu a wordo informa di e asesinato via di un informante, declaracionnan di testigonan ocular riba negociacionnan entre e sospechoso y ex Minister di Finanza di Corsou, George Jamaloodin (di loke mester paga) y mensahenan di SMS cu e sospechoso tabatin di dje cu Jamaloodin. Cu esaki a pone un banda un prueba uza door di Hues di prome instancia cual ta e declaracionnan di testigo anonimo B5 y a agrega un prueba cu ta e declaracionnan riba e negociacionnan entre Jamaloodin y e sospechoso.