Corte lo dicta riba 5 di november y lo tin mas claridad tocante base legal Toque de Queda

Ministerio Publico a presenta awe na Corte e pregunta si e Toque di Queda cu a keda impone na augustus ultimo, tin suficiente base legal y por wordo considera legitimo. Ta na Corte pa dicidi si e (di dos) Toque di Queda aki tabata necesario y propocional. Un Toque di Queda ta un medida cu ta limita libertad di e ser humano y cu ta viola derechonan ancla den e Constitucion di Aruba y e Tratado Europeo pa Derechonan Humano (EVRM).

Un condicion importante ora ta impone restriccionnan riba derechonan fundamental ta cu esakinan ta necesario y proporcional. EVRM ta exigi specificamente cu restriccionnan cu wordo imponi, ta semper respeta e esencia di e derechonan fundamental di e ser humano. Corte Superior di Derechonan Humano ta reconoce sí cu estadonan cu ta cay bao EVRM, tin cierto ‘margin of appreciation’ (of espacio pa usa nan mes huicio) ora di tuma medidanan preventivo pa cu proteccion di salud.

E Toque di Queda actual a keda estableci pa medio di un ministeriële regeling riba 28 di augustus 2020. E prome Toque di Queda a wordo, conhuntamente cu varios otro medida, estableci na maart di e aña aki y a dura te fin di mei. Durante e periodo ey tabatin un cantidad di medida: frontera tabata cera, tur horeca tabata cera, tabatin Shelter in Place, scolnan tabata cera y companianan no-esencial tabata cera. Ministerio Publico ta di opinion cu tabata hustamente e conhunto di tur e medidanan aki cu a haci cu e Toque di Queda tabata legitimo. Corte tabata de acuerdo cu esaki y Huez a considera e prome Toque di Queda legitimo.

Sinembargo, ora di establece e Toque di Queda actual na augustus ultimo, no a tuma ningun di e medidanan aki. Frontera a keda habri, hotelnan, restaurantnan y companianan a keda habri y no tabatin Shelter in Place tampoco. Ministerio Publico a bisa esten, tambe den media, cu e cuestion ta bay ta si e di dos Toque di Queda lo wordo accepta di nobo pa Huez den Corte, considerando e circumstancianan menciona aki riba.

Durante e tratamiento di awe y tumando tur cos den consideracion, Ministerio Publico a finalmente yega na e huicio cu e Toque di Queda actual no ta cumpli cu exigencianan. Ministerio Publico a pidi Huez pa sigui cu ontslag van alle rechtsvervolging (ovar, exoneracion di persecucion) di e dos sospechosonan cu a wordo hiba dilanti huez pa violacion di e (di dos) Toque di Queda.
Ta tarea di Ministerio Publico pa, a base di Constitucion di Aruba y como parti di poder hudicial, trece pa dilanti dudanan cu por reis relaciona cu ley y reglanan y pa pidi Corte pa huzga.

Corte lo dicta riba 5 di november venidero. E ora lo bin mas claridad tocante e Toque di Queda actual.

Comments

comments