DEN HAAG, Hulanda- Ex premier Gerrit Schotte pa e proximo añanan lo ta tras di tralie. Esaki ta despues cu Corte di Casacion a mantene e sentencia di tres aña di Corte di Prome Instancia como tambe Corte di Apelacion. E sentencia ta nifica cu Gerrit Schotte, lider di MFK pa e proximo 5 añanan no tin mag di ta miembro di Staten. Pa loke ta e sentencia contra di e pareha di Schotte, Cicely van Dijs, aki tambe Corte di Casacion a mantene e sentencia di 15 luna di cual 6 ta condicional.
Dia 10 di october 2010, Schotte a bira e prome Minister Presiente di pais nobo, Corsou. Esaki tabata e pensamento tambe di e mafiaboss Francesco Corallo mas un man yen di empresarionan duduso, na momento di funda MFK: Schotte, un homber carismatico popular cerca e hobennan a logra strika casi 2 miyon na soborno a cambio di cual e lo faborece su sponsornan, asina cu e logra bira e lider di un gabinete di marioneta.
Gran parti di e placanan di soborno el a purba di ‘deshaci’ di nan door di deposita esakinan riba cuentanan bancario den exterior, el a purba di laba mas o menos 200 mil dollar door di traha recibonan falso. Ta te despues di su retiro forsoso, cu Ministerio Publico a dicidi di cuminsa investiga e lasonan entre Schotte cu e mafioso Siciliano, residencia na St. Maarten, Corallo y e fluho di placa entre nan dos.
Cu e sentencia di diamars, e caso Babel ainda no a termina. Corte di Willemstad ainda mester trata e apelacion di Schotte pa e pago di 1,8 miyon florin na Ministerio Publico door di “entrada criminal”. Locual cu Schotte no a wordo acusa di dje (ainda) ta e miyones di florin cu, durante su gobernacion, a wordo malversa via NV-nan di gobierno cu no ta drenta den caha di gobierno.
Ya caba durante su nombracion tabata tin indicacionnan tabata tin duda cu Schotte lo por ta ministeriabel, pero pa ora e resultado di screening door di Veiligheidsdienst a drenta, a resulta cu mas di un miembro di su gabinete no tabata ministeriabel, pero ya e ora e huramentacion a tuma luga caba.