Dialuna Corte Comun di Caribe Hulandes a dicta sentencia den e Caso di Apelacion den e caso conoci como “Speeltuin”, den cual a condena Gabriel Martin, padrastro y Risheila Frans, mama.
Ambos a wordo acusa di a mata Eugene y Rishandroh. Corte di Prome Instancia a dicta sentencia contra e mama, Risheila Frans, na 3 aña di prizon di cual 1 ta condicional. Es decir, e lo sinta dos aña di tres. Den caso di Gabriel Martin, el a keda condena na 15 aña di prizon y despues TBS. Den caso di Gabriel Martin, a conden’e na 15 aña di prizon y despues TBS, unda cu e lo mester wordo interna den un centro. Pero Martin no a keda contento cu e sentencia y a apela esaki.
Corte Superior, di cual ta sinta tres Hues for di otro islanan den Reino Hulandes, despues di a evalua e caso completamente di nobo, a dicta nan sentencia dialuna merdia. Aunke cu Ministerio Publico a mantene e mesun castigo pidi durante tratamento di e caso den Prome Instancia, esta castigo di 15 aña, por mira claramente cu e huesnan a desvia y por el contrario,a aumenta e castigo. Segun e magistradonan, nan ta haya cu e caso ta mas serio di locual Ministerio Publico mes ta imagina y e actitud di Gabriel Martin durante henter e tratamento di e caso tampoco no a yud’e, pues no por a sinti ningun sorto di remordimento ni duele pa e acto cometi contra di e dos muchanan.
Enbes di a baha e castigo, e huesnan cu a trata e caso, dialuna a opta pa aumenta su castigo y his’e di 15 pa 18 aña di prizon y despues di esey mar’e na TBS obligatorio den un centro cera.
Cu e sentencia aki, e probabilidadnan cu Gabriel Martin pa sali for di prizon, ta hopi chikito. Mas bien, e lo keda cera pa resto di su bida. Realidad ta cu Gabriel M. no ta 100% responsabel pa su actonan, debi na problemanan mental. Esaki tambe ta e motibo cu a tene cuenta cu e realidad ey y a oblig’e na haya ayudo mental despues di sinta su castigo. E lo keda cera te ora cu’n dokter determina cu e ta cla pa ta bek den sociedad, cual den realidad, ta casi imposibel. Tambe hues a tene cuenta cu na Aruba no tin un centro asina ainda. Lo tin di spera cu esaki wordo construi den e proximo 18 añanan.
Sentencia CasoMartin