Dialuna, dia 6 di mei 2024, Corte a celebra su di 155 aniversario. Oficialmente e dia di aniversario di corte ta dia prome di mei. E aña aki, a combina e celebracion cu Bevrijdingsdag.
Den e contexto aki, den tur e sedenan di corte, conhuntamente cu e organisacion responsabel di Fredom Meals di Reino (https://freedom-meals.com), a ofrece un lunch special pa tur e coleganan. E lunch aki ta simbolisa no solamente e unidad dentro di Reino, sino tambe e reconocemento profundo pa diversidad y e fortalesa di nos sociedadnan riba e seis islanan cu Corte ta presta servicio hudicial.
Prome cu e lunch, a tuma luga conferencia na diferente luga. Na Corsou, e charla a wordo haci pa Allan van der Ree, di e Museo di Segunda Guera Mundial di Corsou, mientras cu na Aruba e conferencia tabata bao encargo di Luc Alofs, antropologo cultural, historiado y specialista den patrimonio.
Como parti di e celebracion aki, Corte a comparti cu orguyo un mensahe di video di parti di mr. Mauritsz de Kort, presidente di Gemeenschappelijk Hof van Justitie, caminda cu e ta reflexiona riba e significado di e momento historico ey.
