Minister di Relacionnan Exterior, Stef Blok a anuncia awe cu Corsou lo bira un hub pa ayudo humanitario pa Venezuela, esaki ariba peticion di presidente interino di Venezuela, Juan Guaido, como tambe di parti di Merca.
HUB
E mandatario a informa di esaki den un carta manda pa Tweede Kamer. “Gobierno, den cuadro di e necesidad humano grandi cu ta existi na Venezuela, y den consulta cu Corsou, a tuma e decision pa acepta e peticion di presidente interino di Venezuela, Juan Guaido y di Merca pa haci di Corsou un hub logistico pa e ayudo humano. Gobierno kier logra cu e ayudo aki en berdad lo yega e pueblo di Venezuela. Den consulta cu Corsou y Merca, e modalidadnan preciso di operacion aki lo wordo anuncia despues”, e mandatario a afirma.
Apart di e posibel hub logistico, e minister a informa Tweede Kamer tambe den su carta ariba e esfuersonan di gobierno Hulandes pa loke ta trata e situacion na Venezuela. Hulanda hunto cu otro miembronan di Union Europeo a reconoce Juan Guaido como presidente interino di Venezuela.
Segun fuentenan inoficial, Merca kier haci uzo di e airport di Corsou pa transporta e mercancianan di prome necesidad via un brug aereo pa Venezuela. Pa esaki nan tin mester di e autorisacion di e actual mandatarionan na Caracas, cu actualmente ta na e frontera cu Colombia pa e ayudo humanitario no drenta.
VENEZUELA
Tensionnan ta halto na Venezuela. Maduro, a pesar di e presion internacional halto y protestanan masivo den varios estado di e pais, ta nenga di renuncia na su cargo presidencial. Sporadicamente ta permiti e asistencia, pero esaki den su mayoria ta blokia. Juan Guaido, presidente interino a informa cu e ayudo humanitario lo drenta Venezuela, sea como sea.