Corsou: Elogio i sosten di gobernador pa Voedselbank

Pictures by © Berber van Beek https://www.facebook.com/studiorootzphotography/ or www.studiorootz.com

Su ekselensha gobernador Lucille George- Wout a hasi un bishita na Voedselbank pa mira kon boluntarionan ta traha pakete di komestibel pa hendenan ku ta den nesesidat pa motibu di Covid-19. Señora gobernador a keda asina impreshoná i konmoví ku e mes tambe a yena saku di komestibel.
E bisita a tuma lugá djaweps 14 di mei. Gobernador George- Wout a mustra hopi interes pa henter e proseso di trabou di Voedselbank for di kompra di produkto, produkshon, paketá te distribushon di pakete. Pero tambe señora gobernador a hasi hopi pregunta tokante kolaborashon entre instanshanan konserní, registrashon di petishon i kontròl despues di entrega di pakete.
Presidente di Voedselbank Sheryl Losiabaar a splika kon diferente organisashon a uni den Samenwerkende Hulporganisaties Curaçao na momentu ku tabatin asina tantu petishon ku Voedselbank no por a atendé ni manehá e situashon riba su mes. Ku sosten di Samenwerkende Hulporganisaties Curaçao, Voedselbank por a oumentá su produkshon i distribushon di pakete di komestibel di 100 pa luna te mas ku 3000 pa siman. Un logro ku tur persona i organisashon enbolbí ta masha orguyoso di dje.

Losiabaar a splika tambe kon e proseso ta kana pa un hende risibí pakete di komestibel. Via whatsapp +59995291919 ta drenta den kontakto ku un callcenter ku ta registrá petishon i ta kontrolá si e persona ya ta den e sistema kaba. Ta kordiná e proseso di entrega i na momentu ku un persona risibí su pakete e ta firma ku ela haña un pakete riba tal fecha, pa asina por planea mesora ki dia tin ku hasi e siguiente entrega.
Despues di e splikashon señora George-Wout di su mes tambe a kohe un tas i a pasa e liña di produkshon pa e mes eksperenshá e proseso di yena tas di komestibel. Tambe gobernador a tuma hopi tempu pa papia ku representante i boluntario di e diferente organisashonnan ku ta forma parti di Samenwerkende Hulporganisaties Curaçao, ekspresando su gratitut pa e bon trabou i ofresiendo su sosten. Gobernador a mustra presentenan riba importansha di nan trabou, enfatisando ku Voedselbank ta duna speransa.

Comments

comments