Gobierno di Corsou a tuma diferente medida relaciona cu aumento di casonan di covid-19 riba e isla. Den un conferencia di prensa a informa di e ultimo cifranan di contagio y a reacciona riba aumento di casonan di contagio a Hulanda pa cual a tuma medida relaciona cu biahamento entre Hulanda y Corsou.
Dr. Izzy Gestenburth den e conferncia di prensa a bisa cu e contagionan na Hulanda ta subiendo debi na e variante Delta. E ta un problema, pa motibo cu e ta plama hopi lihe y esaki ta causa di e cantidad grandi di casonan na Hulanda. Esaki mientras cu na Hulanda y otro paisnan di mundo, a fada di medida y a suavisa esakinan. E consecuencia ta cu hendenan a cuminsa biaha y e contagionan a bolbe aumenta.
Si ta keda habri, mester wak con ta protege e pueblo pa evita mas tanto contagio. E contagionan na Corsou ta subi, pero oficialmente no a detecta Delta ainda na e isla. Aunke el a bisa na mesun momento cu e ultimo biaha cu a haci e test pa Delta tabata cuatro siman pasa.
E cifranan di awe a subi basta y a bira 84 contagio nobo. E ta kere cu e trend di aumento lo sigui.
Mayoria di esnan positivo, den e ultimo dos siman, ta bou di 40 aña di edad y mayoria no ta vacna.
Prome Minister Pisas a splica cu entrante dialuna awo, 19 di juli, Hulanda ta bay cay bou di e categoria color cora. Pues un pais di riesgo hopi halto. Tur pasahero cu ta bini di Hulanda mester haci PCR test maximo 72 ora prome cu vuelo. Esaki ta inclui residentenan di Corsou full vacuna cu ta bini di Hulanda. Y tres dia despues cu nan yega mester haci un test di antigene. Esnan cu yega Corsou y test positivo, mester bay minimo dies dia den isolacion.
Team di Crisis a reuni cu diferente instancia y tur a mustra comprension pa decision tuma.
Ta bay cuminsa cu control na eventonan di riesgo halto. Awo e control no ta debido, pa cual gobierno lo cuminsa controla e controlnan aki. Si no ta cumpli lo tuma medida. Ta papia aki di actividadnan cu mas di 150 bishitante.
Team di Crisis ya a cuminsa pa sinta cu e gruponan di interes pa papia riba e cumplimento di reglanan.
Ta keda uza tapaboca na negoshi y otro instancianan, y den transporte publico tambe. Ta pidi pa evita aglomeriacion, wanta dos meter di distancia, etc. Pues tur medida manera na inicio di e pandemia.