Despues di e eleccion parlamentario na maart ultimo, finalmente Corsou tin su gobierno cu a huramenta dialuna mainta. Pa e motibo aki den oranan di atardi a huramenta esnan cu a drenta Parlamento na luga di esnan cu a bira Minister.
Por corda ainda cu e elección a pasa den hopi reto. Un candidato, Almeir Godett, riba lista di Trabou pa Korsou a wordo tira mata dia 7 di maart. No por a adapta su nomber mas riba e lista. E 427 votonan cu el a ricibi a bay pa e partido y no un candidato specifico manera a bisa inicialmente.
Aunke for di prome instante a bisa cual lo ta e coalicion, toch el a dura basta tempo y tambe tabatin problema cu screening di e ministernan.
Pero riba dialuna 14 di juni, 2021, pa 3’or di atardi na palacio di Gobernador di Corsou Lucille George- Wout a tuma luga e ceremonia di huramento di cinco representante nobo di pueblo cu a drenta Parlamento awor cu esnan cu a despedi y mainta a hura pa asina bira Minister den Gabinete di sr. Gilmar “Pik” Pisas. E acto di huramentao a tuma luga den presencia di Presidente di Parlamento sra. Charetti America-Francisca y Griffier sr. Silvin Cijntje. E Miembronan di Parlamento cu a drenta nobo ta sr. David Seferina, sr. Ramon Yung, sra. Corine Djaoen- Genaro, sr. Elvin Gerard y sr. Amerigo Thode.
