Ya nos ta mita di aña 2017 y Fundacion Anti Droga Aruba ta keda manda e mensahe pa cu e resto di aña cu ta bini corda bo amigo DiDi. Sra. Rulienne Arends ta splica.
Tin hopi hende ta puntrando pa amigo DiDi, y FADA ta informa cu nan ta hopi activo cu amigo DiDi, preparando pa un siguiente clip cu pronto lo sali den vakantie. E prome lunanan di aña a bay tremendo. FADA tabata tin algun clip cu nan a lansa y tabata purba mensahenan constantemente, pa tur hende, mirando tambe cu ultimo weekendnan tabata tin hopi eventonan rond di Aruba. Dus esey ta pone cu careteranan ta hopi druk. Y Sra. Arends ta splica cu nan kier tur hende pasa bon, den compania di amigo y famianan. Pero FADA kier conscientisa tur hende pa corda ariba amigo DiDi. Si bo ta bay bebe, laga un hende stuur pabo.
E fin di siman aki, un biaha mas Aruba tin diferente evento. Nan ta bay tin bishitantenan na Aruba, y nan no kier pa nada no bay pasa. P’esey tambe FADA kier tuma tempo pa papia cu tur hende, pa tur hende gosa di e eventonan. Si bo ta bay bebe, corda pa hiba bo amigo DiDi cu bo(so).
Sra. Arends a sigui bisa cu nan ta hopi contento con e prome lunanan a bay. Nan tabata tin diferente clip cu tabata exitoso. Y nan tabata tin diferente mensahenan cu diferente eventonan. Nan kier corda tur hende cu amigo DiDi no ta solamente ora cu tin evento, pero corda cu semper amigo DiDi t’ey.
Mirando cu e fin siman aki tin diferente evento importante, Aruba lo ricibi hopi bishitantenan. Y nos hendenan di Aruba ta cla pa bay gosa, y p’esey FADA kier pa tur hende corda ariba amigo DiDi.
For di e pagina di Facebook di amigo DiDi, hopi hende ta bezig ta wak e videonan, nan ta like e video. FADA sa cu e amigo DiDi ta eyfo y cu hopi hende ta compronde kico e ta. Y apesar cu ta wak den noticia, constantemente, cu polis ta para hendenan bou di influencia y ainda tin accidentnan ta sosode, pa motibo di alcohol.
Sra. Arends ta spera cu poco poco e cambionan cuminsa bin. Nan sa di varios grupo di famia y amistadnan, cu ta bisa cu nan ta bay sali pero cu semper nan ta hiba un hende cu ta fungi como amigo DiDi. E ta bay poco poco, hopi mas hende ta bira consciente y FADA ta contento cu esey.
FADA ta bay diferente charlanan, y e trahadonan preventivo ta mas cerca di e hobennan. Nan sa di e amigo DiDi y ora di papia cu nan over di e tema di alcohol, nan mes ta trece dilanti. Algun di e hobennan ta splica cu nan ta purba di stimula nan mayornan of un familiar, pa ora nan sali den famia, pa tin un hende pa stuur pa nan. E hobennan, e ta un topico no facil, pero tin hobennan cu sa di esaki y ta haciendo di nan banda tambe, segun Sra. Rulienne Arends, di FADA.