Ciudad de Mexico, MEXICO- Despues di 27 aña trahando como editor pa e corant Mexicano Norte, Oscar Cantu a dicidi cu tabata miho pa stop e publicacion imprimi. E decision aki a wordo tuma despues cu e periodista Miroslava Breach a wordo tira mata dia 23 di Maart, ora cu e la bay hiba su yiu scol na Chihuahua.
Breach tabata e directora editorial di el Norte de Ciudad Juares, tabata coresponsal pa e corant La Jornada y tabata colabora tambe cu e corant El Norte di Chihuahua.
E periodista a sali for di su cas pa laga su yiu di 10 aña na scol y pa banda di 10 or e ta wordo ataca. Breach a wordo tira ocho biaha y lamentable di e caso ta, cu su yiu tabata banda di dje. \
Durante luna di Maart, tres periodista a wordo asesina den diferente estado di Mexico.
For di December 2012, ora cu e gobierno di Enrique Peña Nieto a cuminsa 106 periodista a wordo asesina den e pais, segun datonan di e organisacion Articulo 19.
E cierre di e corant ta un forma di protesta, segun Cantu. Un protesta silencioso.
Segun e director, no ta bale la pena pone bida di e periodistanan den peliger pa reportahenan pa cual “lo no tin husticia”.
Miroslava Breach tabata conoci bou di su coleganan, activistanan y hasta politiconan di gobierno como un periodista incomodo pa gobierno y e gruponan di poder.
E periodista tabata informa ampliamente riba supuesto vinculonan entre crimen organisa y e politiconan di e estado di Chihuahua tanto pa Norte di Ciudad Juarez como pa La Jornada.
Luna pasa, gobernador di Estado di Chihuhua a bisa cu su gobierno no tin e recursonan necesario pa bringa e crimen organisa y el a solicita recursonan federal pa yuda e polis local bringa contra e cartelnan di droga.
Fuente:www.bbc.mundo