Coral Princess pa largo plaso na Corsou

Willemstad, 16 di mei 2020 – Barconan crucero actualmente ta buscando puertonan sigur y cu e factibilidad necesario pa drumi mientrastanto cu e sector crucero ta en espera pa e mercadonan ta funcional atrobe.
Diferente compania y departamentonan di gobierno a plania hunto pa por brinda e servicio aki na liñanan crucero pa asina crea actividad economico den nos puerto, semper teniendo na cuenta e reglanan di precaucion stipula pa gobierno den cuadro di e crisis relata na COVID-19.
Curaçao Ports Authority (CPA) a aserca gobierno di Corsou pa permiti barconan crucero para den nos hafnan pa largo plaso cu solamente un cantidat limita di tripulante na bordo.
Instancianan di gobierno tanto MEO, GMN, VVRP y AZ a duna nan cooperacion completo pa por haci esaki un realidad.
RDK tambe a ofrece nan disponibilidad pa barconan por mara na nan localidadnan maritimo.
E cooperacion di tur e companianan y instancianan di gobierno hunto a resulta cu e prome barco crucero Coral Princess di e liña crucero Princess Cruises a scoge Corsou como destinacion pa mara pa largo plaso.
Coral Princess a mara na Mega pier Jackie Voges diasabra 16 di mei, 8or di mainta.
E barco tin 294 meter di largura y un peso di 91,627 gros ton. Tin un tripulacion minimo di 192 persona a bordo di cual niun por desembarca.
Tur persona mester keda 14 dia a bordo den cuarentena y despues di e 14 dia aki tur lo ser di test dor di funcionario di departamento di salud.
Na momento cu tur test sali negativo lo permiti (parti di) e tripulacion desembarca pa repatria si esaki ta necesario.
Mescos cu otro puertonan di importancia den region, Puerto di Corsou tambe ta asisti e barconan crucero den cuadro di e bon relacion entre Corsou y e companianan crucero, cual alabes ta crea e oportunidad di trabou riba diferente area pa operadornan local den haf durante e temporada dificil aki.

Comments

comments