Reino: Rapport recien for di copernicus EU, e organisacion di clima di Union Europeo, ta indica cu e luna di september di e aña aki tabata e luna mas calor cu a wordo midi den historia.
Cu un temperatura di 16,38 grado Celsius, e temperatura tabata 0,5 grado mas halto cu e record anterior, di september 2020. Esaki ta un diferencia notabel den e statesticanan di clima.
Den september 2023, e tabata 0,93 grado mas halto cu e temperatura promedio di september entre 1991 y 2020.
Aña mas calor for di comienso di medicion
Cientificonan ta splica cu e temperaturanan halto ta wordo causa pa e continuo kimamento di combustibel fossil, hunto cu e fenomeno meteorologico “El Niño” temporada di calor. E fenomeno aki ta causa e awanan di lama cerca di e liña di Ecuador den oceano pacifico ta bira mas cayente.
Segun Copernicus di Union Europeo, e aña actual tambe ta ,mustra di bira e aña mas cayente.. Segun e raporta, temperatura promedio riba tera pa e aña aki te awe ta 1,4 grado Celsius mas halto cu e “temperaturanan promedio pre-industrial”, cu ta un periodo for di 1850 te 1900.
Ya a kibra hopi record di temperatura pa e aña aki. Juli, por ehempel, tabata e luna mas cayente registra, y juni tabata e juni mas calor. Ademas, mitar di 2023 tabata e temporada mas calor registra den mundo.
“Temperaturanan Sin Precedente”
E hefe interino di Copernicus ta papia di “temperaturanan sin precedente pa e temporada aki”. “Dos luna promer cu e conferencia di clima na Dubai, e urgencia pa un politica ambisioso pa clima nunca tabata asina grandi.”
Copernicus ta haci uso di miles di medicion for di satelitenan, bapornan, avionnan y stacionan di tempo, y despues analisa nan datos. Esaki ta alerta pa e necesidad di atende cu urgencia e tema di clima y busca solucionnan pa e problema.