Dia 7 di december 2018 Inspectie Volksgezondheid Aruba (IVA) a saca un relato unda cu a informa pueblo cu tin un cierto produccion (batch) di e remedi Valsartan di e fabrica Pharmachemie cu a wordo saca for di mercado na Boticanan na Aruba pa motibo di contaminacion. E remedi Valsartan ta wordo prescribi pa individuonan cu ta sufri di presion halto y cu problemanan di curason. Den e relato IVA a pidi tur pashent cu ta uza e remedi aki pa controla e RVG-nummer patras riba nan paki di remedi. IVA kier a agrega cu mester controla e batchnummer (charge) tambe. Esaki por haya na banda riba e paki di remedi.
Solamente e remedinan Valsartan cu e RVG-nummer y batchnummer cu tin riba e lista cu a ricibi di e compania farmaceutico a wordo saca for di mercado na Aruba. Pues, no ta tur remedi Valsartan cu a wordo importa na Aruba ta contamina. IVA ta pidi tur pashent pa por fabor controla e RVG-nummer y batchnummer prome cu acudi na nan botica. Inspectie Volksgezondheid Aruba lo informa pueblo di cualkier cambio na su debido momento.
E RVG-nummers y batchnummers por haya den e tabel anexo y riba nos website: www.iva.aw