Pa hopi aña caba, Guarda nos Costa ta un departamento para y no tabata tene mucho control, cual a resulta den e problematica grandi di ilegalnan na Aruba. Segun encuestanan, tin entre 25,000 y 30,000 ilegal na Aruba. Awor fronteranan ta hancho habri cu botonan ta keda drenta. Esaki a pone cu controlnan a cuminsa tuma lugar, pero esaki no a cay den tera cerca cierto personanan cu ta critica manera e controlnan aki ta algo malo.
Sra. Trudy Hassell, di Management Team di Guarda Nos Costa, ta splica cu ora el a yega na Guarda Nos Costa, el a cuminsa haya hopi informacion y tipnan di pueblo. Locual el a cuminsa haci durante e dianan el a asumi su responsabilidad como hefe di Guarda nos Costa ta tuma e decision pa bay trata e asunto di ilegalidad den prostitucion. Esaki ta pa henter Aruba. A cuminsa cu un accion diabierna cual, segun Sra. Hassell, no tabata intencion di bay controla primeramente e barnan na San Nicolas. Pero ora nan a yega na dicho sitio, a bin topa e damanan cu ta practica e trabou di prostitucion riba caya, cual no ta permiti, pues nan tin permiso pa haci nan trabou solamente paden di e establecimentonan. Sra. Hassell mes a aserca un di e doñonan di e barnan pa pidi’e e documentonan di e damanan, pero e ultimo a nenga pa entrega e documentonan cu consecuencia cu e ekipo di Guarda nos Costa a sigi proceduranan legal y transporta e damanan na Guarda nos Costa pa haci control. E controlnan a confirma cu e damanan ta legal y a transporta nan bek pa nan trabou.
Sra. Hassell ta resumi cu no ta posibel pa wak na un persona su aspecto fisico si e ta legal of ilegal. E procedura ta pa aserca e persona aki y papia cun’e. Si e persona of personanan envolvi no mustra cooperacion, nan mester wordo hiba na Guarda nos Costa pa control. Esaki ta apenas un tereno so cu Guarda nos Costa a toca y cu pueblo por spera mas controlnan na caminda.