AZV ta informa tur asegurado inscribi cerca dentista Harold Hagens cu riba 22 di april 2020 e contracto entre AZV y dentista Harold Hagens ta termina. Tur tratamento actual por wordo completa, con tal esaki keda cla prome cu 22 di april 2020. AZV ta gradici dentista Harold Hagens pa tur e añanan di servicio y cuido na e aseguradonan di AZV.
Traspaso automatico
Pa e continuacion di cuido dental, AZV a haci un traspaso automatico y tur asegurado inscribi cerca dentista Harold Hagens ta pasa awor pa dentista Amanda (Mandy) Hagens. Dentista Amanda (Mandy) Hagens lo duna servicio na mesun adres, esta Tanki Flip 12. Number di telefon ta keda mescos.
Dentista Amanda Hagens
Dentista Amanda (Mandy) Hagens tin 34 aña y a studia na Radboud Universiteit Nijmegen, Hulanda. E tin 8 aña di experiencia como dentista. Despues di finalisa su estudio, el a keda na Hulanda pa haya experiencia y pa sigui desaroya su mes siguiendo diferente curso y entrenamiento. Desde januari 2015 e tin su propio oficina di dentista na Amstelveen. Esaki den poco tempo a crece exitosamente. Dentista Amanda (Mandy) Hagens a specialisa su mes den implantologia, odontologia estetico y trabou di kroon y brug. Adicionalmente e ta haci tur tipo di tratamento dental regular. E tin experiencia amplio cu tratamento di pashent cu tin miedo y mucha. Su pashentnan a dun’e e nomber di “de lieve tandarts”. Dentista Amanda (Mandy) Hagens ta papia e idiomanan Papiamento, Hulandes y Ingles.
Servicio
Manera cu e COVID-19 ta tras di lomba y e ‘lockdown’ keda aboli, e oficina lo keda completamente renoba cu e aparatonan di mas moderno. Lo digitalisa tur cos y lo comunica mas cu pashentnan e.o pa medio di confirmacion di cita via email. Dental Clinic Hagens ta pone calidad na prome luga y ta haci uzo di e tecnicanan di mas moderno incluyendo e miho materialnan cu tin. Ta percura pa duna e cliente servicio di calidad halto.
Desacuerdo cu e traspaso automatico
Den caso cu bo persona no ta di acuerdo cu e traspaso automatico, e ora por scoge pa otro dentista. Bo ta bay riba e website www.azv.aw y ta yena e formulario di cambio di dentista . Ora bo ta cla, manda e formulario na [email protected] Si ta desea di wak e cambio, por download e AZV Aruba App den Google Play of App Store pa asina registra pa e digi-ZorgPas y wak e nomber di e dentista nobo.