E Afpakteam Integral di Aruba diamars anochi a duna un golpi duro na esunnan cu ta haci contrabando di combustibel.
Den cooperacion cu varios instancia, entre cual KPA, Douane y Kustwacht, e Afpakteam Integral a haci un inval na varios adres caminda 6 persona a keda deteni. Na varios luga a haya un gran cantidad di combustibel ilegal, cualnan a wordo tuma den beslag. Autoridadnan tambe a coy un go-fast speedboot y tres boto cu cual e contrabando tabata wordo haci posibel.
E contrabando di combustibel ta prohibi. E ta un delito pa trece combustibel tera, cu e meta pa bende esaki. Recientemente e importacion di combustibel, otro cu den bulto (gran cantidad) a keda prohibi. Esaki ta pa contraaresta e importacion ilegal na un scala chikito.
E lucha contra di importacion ilegal, almacenamento y e comercialisacion di combustibel tin un prioridad halto cerca Ministerio Publico y e Afpakteam Integral . E motibo principal di esaki ta e peliger grandi cu e contrabando ta trece pa e persona y e productonan. E peliger aki a keda demostra varios biaha den e ultimo lunanan ora cu un boto di bela, cu combustibel ilegal a bordo, a coy candela ariba lama grandi, kimando e boto por completo. E investigacion a demostra cu e combustibel ta wordo transporta, descarga, almacena y bendi di manera no regula y insigur ariba tera cu ta yega den zonanan residencial densamente pobla, caminda nan ta wordo transporta, descarga, almacena y bendi. Mester pensa ariba e consecuencia cu si un di e depositonan ilegal aki di combustibel mester coy candela un dia den un area residencial, esakinan lo ta desastroso.
Un di dos motibo ta e combatimento di concurencia unfair. E combustibel ilegal ta wordo bendi na un prijs hopi reduci, y esaki ta haci e competencia hopi dificil.