AMSTERDAM- Na 2018 un cantidad record di 73 mil kilo di cocaina a wordo intercepta cu tabata tin Hulanda como destinacion. E aumento den e comercio ta bay man den man cu forsa bruto y corupcion. Criminalnan ta hasta purba di exporta cocaina for di Sur y Centroamerica pa Europa.
Esaki ta resulta durante The Coke Connection, un congreso internacional tocante e contrabando di cocaina. Servicionan di Investigacion di Hulanda, Belgica y di Sur – y Centroamerica durante dos dia lo trata e enfoke di e problema di cocaina. Minister Grapperhaus a adverti den Congreso a trabes di un mensahe di e aumento di comercio y violencia y e corupcion cu esaki ta trece cun’e. Hulanda a bira e pais di transito mas importante di Hulanda. Contrabanda y delincuencia ta menasa Hulanda y Europa.
Segun investigacionnan, un di cada tres atake di curason di personanan di entre 18 pa 25 aña ta relaciona cu uzo di cocaina. Hulanda ta ocupa e puesto nr. 3 na Europa pa loke ta consumo di cocaina. E cooperacion cu paisnan den sur y centro di Europa ta di importancia pa combati e contrabando. Criminalnan di cocaina ta opera na nivel mundial y a desaroya den e miho empresarionan.
Cu Hulanda ta birando mas importante cada dia como pais di transito ta resalta for di e hecho cu aña pasa a descubri 21 cultivacion di cocaina na Hulanda, den cual pasta di cocaina ta wordo traha cla pa wordo uza. Te cu algun aña atras, tabata trata aki di algun cultivacion pa aña.
Na 2018 casi 74 ton di cocaina a wordo descubri na Hulanda y na Belgica. E cargamento cu a wordo intercepta na Belgica tabata tin Hulanda como destinacion. E aña anterior na esaki tabata trata di 54 mil kilo di cocaina. For di servicionan di inteligencia ta yega e informacion di cu criminalnan sea ta uzando submarinonan of tin pensa di uza submarino pa transporta cocaina pa Europa.