E evaluacion anual di e contracto di e personal di Colegio Arubano ta mustra cu, pa e siguiente aña escolar lo mester yena solamente ocho vacatura pa docentenan pa diferente vaknan na Colegio Arubano.
Esaki segun e Raad van Bestuur a duna di conoce. Manera ta custumber pa decadanan caba, anualmente tur contractonan tanto temporal como esunnan pa un temporada ta wordo evalua. E 15 contractonan cu lo finalisa e aña aki no ta un novedad. Durante aña escolar 2014 – 2015 Colegio Arubano mester a termina 18 acuerdo laboral pa diferente motibonan. Aña pasa tabata 9 acuerdo laboral.
Riba e overzicht adhunto un bista ta wordo duna di e diferente motibonan pa cual ta termina un acuerdo laboral, tanto temporal como esunnan cu un contracto cu termino mas largo, pa e 15 empleadonan na final di e aña escolar aki, na Colegio Arubano.
Directiva di Colegio Arubano ta obliga na actua segun ley y reglanan vigente.
E decisionnan tuma tabata un paso necesario cu directiva mester a tuma pa garantisa e calidad di enseñansa na Colegio Arubano, pero naturalmente ta sigui e proceduranan pa cu esaki.
Motibonan pa no prolonga un acuerdo laboral ta varia pa persona y directiva lo no bay den detayes, protegiendo asina e privacidad di su trahadonan.
Siguiendo procedura na comienso di Maart a sali algun anuncio pa asina por yena e 8 vacaturanan aki.
Entre tanto, directiva a ricibi como 35 solicitud mientras cu e termino pa solicita ainda no a caba. Scol ta carga responsabilidad pa e continuidad y calidad di e scol.
Tanto e personal como e directiva di Colegio Arubano ta pone enfasis na prome luga pa mehora e resultadonan di estudio na e scol. E rendimento estudiantil ta esencial. Pa esaki mas o menos 25 docente a sigui un curso den e direccion aki, unda cu, despues cu nan haal nan certificado di Traininer, nan lo yuda den e bijscholing di nan coleganan docente. E proceso educativo di Colegio Arubano lo bay dilanti cu stapnan grandi: nos alumnonan lo haya lesnan actualisa, lesnan basa ariba nan propio tempo y nan propio capacidad.
Pero tambe e candidatonan pa examen lo haya training pa asina nan por ta miho prepara pa e examennan benidero na Mei proximo.
Tur hende kier haci nan maximo esfuerzo pa asina e alumnonan ta super bon prepara pa examen.
Por ultimo, nos deseo ta pa tur hende por ta orguyoso riba nos scol, Colegio Arubano.