NEW DELHI, India – E scolnan di New Delhi ta cera y e obranan di construccion paralisa debi na e contaminacion cu ta envolve e capital di India desde un siman pasa y cu ta supone ta un peliger pa salud publico.
E nivelnan di contaminacion a bati record den e ultimo dianan debi na e kimamento riba camponan rond, e polucion di vehiculo y fabricanan, tur di nan combinando cu e caida di temperatura.
E enfriamento di aire ta haci cu e agentenan contaminante no ta disipa, sumiendo na New Delhi bao di un nubia asfixiante.
E calidad di aire a empeora den e ultimo añanan, alcansando nivelnan particularmente halto e herfst aki.
E embahada Mericano, ekipa di captornan specialisa, a ripara for di varios dia di e nivelnan di contaminacion peligroso pa organismo, incluso pa hendenan di un bon estado di salud.
E legacion a registra un tasa di particulanan fini PM 2,5 – specialmente nocivo – di 778 microgram pa meter cubico di aire, mientras cu e Organisacion Mundial di Salud ta recomenda un midi diari di 25 microgram.
E contaminacion ta golpia tur habitnte, rico y pober.
Manan Mahato, conductor di autorickshaw – un especie di taxi cu tres wiel, a laga sa di a manda su yiunan na su aldea natal pa proteha nan salud.
“Biba na New Delhi a bida demasiado riesgoso a rais di e contaminacion,” el a splica, cubriendo su boca cu un lenso.
E Gobierno di New Delhi a anuncia diadomingo e ceramento di scol durante tres dia, e paralisacion di e obranan di construccion durante cinco, mescos cu e paramento temporal di e actividad di un importante central di carbon.
E directora ehecutivo di e Centro di Ciencia y Medioambiente di Delhi, Anumita Roychowdhury, a bisa cu ta medidanan temporal “necesario pa baha e nivelnan di contaminacion,” caminda cu e ta constitui un “situacion di urgencia.”
“Pero naturalmente, esey no por ta permanente, no por cera hende den interior pa semper,” el a adverti.
Fuente: RCN Noticias