Lesa ta dushi, lesa ta crece mi imaginacion. Cu mi imaginacion mi por biaha tur caminda.
Den cuadro di Kinderboekenweek, riba diadomingo 5 di november 2017 Museum of Industry ta organisa su delaster evento di contamento di storia pa muchanan e aña aki. Cu e actividad aki museo ta enfoca ariba e importancia di lesamento. Pa museo brinda e muchanan un mainta Inolvidabel, a invita dos autor cu ta bini conta storia basa ariba e tema di Kinderboekenweek. E dos autornan cu museo a invita ta Sheila Werleman y Emerita Emerencia.
E contamento di storia ta dirigi na muchanan di 4/5/6/7 aña e biaha aki. Contamento di storia ta cuminsa 11:00 am y ta finalisa 1:00pm. Museo mes ta habri su portanan pa10:00 am te 2:00 pm e diadomingo aki. Entrada pa e contamento di storia ta AFL8.75,-pp. Y ta necesario pa inscribi e muchanan prome cu e evento. Por inscribi na [email protected] of por yama na 5847090.
Na final di e evento, tur muchanan ta haya un “treat” prome cu bay cas. Museum of Industry ta gradici Oduber Agencies Aruba, Johnsons Supermarket, New India Insurance Company pa nan sosten y ayudo pa haci e mainta aki posibel pa nos muchanan. Pa esunnan cu ta interesa, por pasa bishita Museum of Industry na San Nicolas.
E museo ta relata e storia di e desaroyo industrial na Aruba den e ultimo dos siglonan, cu ta encera e industrianan di oro, aloe, fosfaat, petroleo y turismo. Museum of Industry ta habri di dialuna pa diabierna di 9.00 am te cu 6.00 pm y riba diasabra di 10.00 am pa 2.00 pm.
Si bo persona ta interesa pa bin cu un grupo of organisa un evento na Museum of Industry, por tuma contacto cu e museo na 584 7090 y tambe por sigui nan via Facebook.