Diaranson mainta, comision di vuurwerk a cuminsa cu e controlnan di containernan di klapchi na tur rebendedornan.
Durante un di e controlnan aki, e comision di vuurwerk, consistiendo di tanto personal di DOW, den persona di Sr. Rubin Ponson y tambe di Cuerpo di Bombero, Sr. Ferdinand Ponson, hunto cu demas autoridadnan a bin topa cu’n container 40 pia patras ariba e tereno di NG Supermarket. Den e containernan aki tabata tin klapchinan bieu, cu tabata data di 2014 y 2015. E intencion di e comerciante Asiatico aki lo tabata pa bruha e klapchinan bieu hunto cu esunnan cu a wordo importa e aña aki.
A bay over di biaha pa confisca e container aki for di nan, y tambe nan vergunning a wordo retira inmediatamente. Pa e comerciante aki en cuestion, di NG Supermarket, esaki ta nifica tambe cu pa e proximo añanan e lo no bin na remarke pa haya vergunning pa bende klapchi.
Ta di lamenta cu comerciantenan ta prefera di “warda” klapchinan bieuw nan mes, enbes di hibanan Wela. Ultimo temponan tabata tin hopi keho di parti di consumidornan cu ta parce cu e klapchinan ta inferior, nan no ta tira of nan no ta tira bon.
Klapchinan bieu por causa desgracia tambe. Un persona cu sin sa, a cumpra klapchi bieuw, ta bay sende esaki. Ora cu e ripara cu e no ta sende, e ta bay cerca pa wak kico a pasa y sin sa, e klapchi ta explota cerca di e persona. Esaki ta trece consecuencianan grave. Ken ta para responsabel pa esaki?
Tiramento di klapchi ta un tradicion di nos hendenan, pero tambe nos mester ta hopi mas consciente di con ta tira esaki, y con pa mantene nos mes sigur ora di tiramento di klapchi. Nos como consumidor mester ta mas consciente di nos mesun siguridad.