Contadonan di cuenta hunto cu empleadonan di Biblioteca Nacional Aruba a ehecuta un otro edicion di e proyecto anual ‘Contamento di cuenta’ na Casnan pa Anciano. Sra. Astrid Gietel, Sr. Lloyd Baptiste y Sra. Ruthie Vrieswijk-Bergen ta e tres 3 contadonan/entrenadonan cu a bishita diferente Cas di Anciano durante ultimo 3 lunanan, hunto cu e team di biblioteca. Diahuebs a clausura e programa na Maris Stella, Savaneta. Esaki a bay den bon ambiente cu canto, storia y bailamento.
Di e manera aki biblioteca ta contribui na hiba actividadnan alegre y informativo pa nos grandinan cu ta biba den e diferente Cas pa Anciano manera e.o. Paviljoen San Pedro, Huize Maris Stella Savaneta, SABA San Nicolas y Cas Marie. Un parti di e programa tabata canto estilo ‘Sing-along’ cu canticanan di antes. E proyecto ‘Conta Cuenta na Casnan di Anciano 2017’ ta bou di encargo di un bibliotecaria y Quota Club Aruba ta ofrece un contribucion financiero pa cubri algun gasto. Un danki na Lloyd, Astrid y Ruthie pa tur cos.