Campeonato Internacional WBSC CONSURSA a continua riba veld di Dragon Hitters. Pa prome biaha den historia Aruba a wordo honra pa ta “cede” di un campeonato oficial di WBSC / CONSURSA di un nivel hopi halto. Aruba ta bolbe gana Peru den e di dos buelta y e biaha aki ta blankia Peru cu un tremendo bateria descargando 11 hit den total. Aruba 6 careda, 11 hit, 1 eror y ta laga 7 coredo den circulacion. Peru 0 careda, 2 hit, 1 eror y ta laga 5 coredo na base. Miho bateadornan pa Aruba a resulta di ta Milvienne Henriquez 4-2, Yee Mei Cheong 4-1, Shakeena Croes y Nikkaela Jacobs ambos di 4-3 produciendo 6 hit den nan dos, Mariella Vleugels y Jennysela Tromp ta bay di 2-1. Pa Peru e unico dos imparablenan a wordo conecta pa Michelle Iparraguirre di 3-1 y Pamela Hirakata di 2-1. Marielle Vluegels ta lansa 7 inning, 43 bola, 56 strike pa un total di 98 lansamento propinando 4 strike out y ta regala 2 base por bola pa seya e victoria riba su nomber. Mariafe Bouchon ta perde e partido lansando 7 inning, 51 bola y 76 strike pa un total di 127 lasnamento propinando 3 strike out y ta regala 3 base por bola. Aruba a sa di luci den e wega aki ganando Peru 2 biaha tanto den primera ronda y den e di dos rond. E di XIII campeonato femenino di WBSC/CONSURSA ta canando fenomenal unda organisadonan ta ricibiendo masha hopi compliment di Confederacion Internacional pa e trabounan organisatorio desplega. Por ehempel Aruba a bay full digital riba scoring y ta mail tur resultado pa Confederacion y Fedracionnan mesun dia y no ta haciendo uso di papel mas. Logistica di transporte ta super bon organisa. Cuerpo di umpire internacional y nacional bou di un instructor internacional Mariano Marrugo perfectamente hinca den otro cu un guia sublime. Pues asina tin hopi aspecto cu Aruba a score hopi halto. Campeonato Internacional un exito total.