Segun Sra. Arends-Reyes recientemente Banco Central a publica su ‘Consumer Confidence Survey’ pa e di 3 kwartaal di aña 2018. Den e comunicado aki ta importante pa subraya cu e Indice di Habito di Consumo a mehora cu 1.9 punto compara cu e kwartaal anterior pa motibo cu e consumidornan a scoge pa bay cu vakantie probablemente den exterior cu a yuda subi e confiansa di consumidor marginalmente cu 0.4 por ciento compara cu e kwartaal anterior. Pues e ponencia cu e consumidornan ta comprende cu nan poder di compra a baha drasticamente y no ta worry y a bira optimista back no ta corecto. Citando literalmente e ta bisa; ‘E Indice di Habito di Consumo a mehora den e trimester bou di revision. Sinembargo, consumidornan tabata solamente positivo pa bay cu vakantie, probablemente causa pa e periodo di vakantie na october.’ Ta bon tambe pa para keto un rato ariba un splicacion recientemente den publicidad cu ta manera bagatalisa e aspecto ‘acumulativo’ di e impuesto tipo ‘bbo’ cu ta purba convence cu ta solamente 1.4 biaha (casi 10% di aumento) so e schakel por ta pa e consumidor y a bisa cu Aruba ta mas tanto un economia di servicio y sugeriendo cu locual e pueblo eyfo ta sintiendo no ta mucho hopi. Un 60% di e poblacion di Aruba ta depende di un minimum loon, y tambe nos pensionadonan cu pa nan e aumento di casi 10% ta hopi por ehempel si bo ta cobra 2 mil florin mes, 200 florin cu bo tawata tin a bay awor na aumento di prijs. Si wak por ehempel e aspecto di cuminda na Aruba practicamente pa 99% tin cu wordo importa di exterior ta mas cu logico cu ta net eynan, na un di e necesidadnan basico pa personanan por sobrevivi ta haya menos pa nan placa. E poder di compra ta wordo afecta y asina nos pueblo lo por sufri consecuencianan di malnutricion. Sobrepeso no ta nifica bon nutri mescos cu ta hopi flaco tampoco nifica cu bo ta saludabel. E ta un aspecto cu mester tene bon na cuenta mirando cu ta e parti di cuminda ta esun cu mas ta wordo afecta e parti di malnutricion por trece cun’e hopi problema pa nos pueblo su salud. E nutricion cu ta haya den e fruta, berdura, carni, galiña y pisca por ehempel cu tin cu paga hopi mas p’e compara cu cos dushi cu ni si tax e extra hopi cu lo ta extraatjes pa caha di gobierno, ainda ta keda mas barata cu cuminda cu ta aporta na un nutricion esencial pa yuda e curpa pa funciona optimalmente. Enbes di castiga e pueblo cu mas impuesto lo ta miho pa conscientisa y incentiva di un manera of otro e cuminda saludabel. Un otro idea cu ta riba mesa presenta pa gobierno ta pa kita e bbo di riba e recibo, esaki ta un idea cu realmente no ta un cu ta beneficia e consumidor mirando cu e tiendanan y supermercado lo por uz’e como excuus pa aumenta e prijsnan mas ainda sin cu tin un control of cu por kita e parti di ‘free enterprise’ for di nan, anto e ora ta miho nan a paga e 6.38% cu lo tawata e motibo pa kita e bbo di recibo. Durante e Masterclass ofreci pa Raad van Advies cu Sra. Arends-Reyes tambe a atende expertonan a bisa cu Aruba no ta cla pa procesa cambionan drastico den cobramento di impuesto, pues cualkier cambio manera kita bbo di e recibo no ta den bentaha of desbentaha pa gobierno pero si por ta den desbentaha pa e consumidor. Bayendo back riba e ‘Consumer Confidence Survey’ pa e di 3 kwartaal di 2018 citando literalmente
‘E gran mayoria di respondientenan (88,3%) ta anticipa cu prijsnan lo subi den e siguiente 6 luna resultando den un Indice di Expectativa di Prijs di 90,3’. Entre 90 cu 100 ta balornan cu ta indica pesimismo den e consumidor, pues e pueblo ta mirando cu pa motibo cu no ta scogiendo un rumbo concreto ni fecha pa e reforma fiscal of den ki forma si lo ta pa aumenta entrada pa gobierno so, ni un fecha pa kita e aumento temporario di bbo cu a priminti e pueblo y gremionan, e ta duna espacio pa mas aumento di prijsnan cu ta fuera di control y reduccion di inversionnan. E excuus cu tur e aumentonan aki ta pa motibo di gobierno anterior ya a bira fofo y a vence, pueblo sa cu ta yega ora pa goberna cu of sin refineria, of por ehempel cu of sin garantia cu a bin ta pagando di basta tempo caba. Gobierno di MEPPORRED no a traha un fondo destina pa e entradanan di impuesto cu pueblo ta pagando pa e proyectonan PPP pues ta uza e cen pa gastonan operacional di gobierno y si resta lo wak kico mester paga pa proyectonan, cu por cierto ta na beneficio di un y tur ora cu nan ta cla y aproba pa Aruba Sra. Arends-Reyes ta termina bisando.