Consuela Cameron ta e cara nobo na Instituto Coreccional di Aruba ( K.I.A.), asina Rocco Tjon, director di KIA, a duna di conoce. Den e proceso di restructura K.I.A., a tuma nota cu e ta importante pa tin un persona cu por haci e parti di comunicacion tanto interno como externo. Directiva di KIA a haya bon cooperacion cerca Minister di Husticia, mr. Drs. Arthur Dowers, cu manera semper ta e caso.
Consuela Cameron a introduci su mes y a splica cu e cu lo bay eherce e funcion di Relacionista Publico pa K.I.A., cual pa esaki ta un funcion nobo y cu e lo enfoca hopi riba comunica encuanto di e desaroyonan positivo cu K.I.A. conoce, tanto a corto como tambe a largo plaso.
Segun Consuela Cameron, hopi biaha tin e tendencia di lubida cu eigenlijk e instituto ta uno coreccional y como tal, nan lo bay pone un accento riba positivismo tambe. Nan ta kere, cu e detenidonan tin e derecho di wordo coregi mientras cu nan ta sintando nan castigo y cu na momento cu esaki bandona e instituto cu nan mester por reintegra bek den comunidad.
Pesey lo pone hopi atencion riba e preso como ser humano, pasobra e no tin niun tipo di sentido si e preso drenta pa sinta su castigo, pa despues e sali bek, sin cu e el a haya oportunidad di siña cosnan nobo, cual lo bay yude den un forma positivo ora e recobra su libertad.