E construccion di e prome casnan sostenible y innovativo di Smart Community ya ta visible. Pronto nos lo jega e punto mas halto di e prome cas. Smart Community ta un comunidad cu lo consisti di un total di 20 cas, cu ta encera 15 cas tradicional y 5 cas futuristico y tambe un centro pa bishitante. Tin 4 modelo di cas cu ta varia di grandura di 106 m2 pa 140 m2. Meta principal di e proyecto piloto aki ta pa haci experimentonan sostenible den diferente area.
E personanan cu ta bay biba den e comunidad y den e casnan aki lo experiencia y disfruta di varios aspecto sostenible den nan cas. Durante e proyecto aki ta bay haci experimento riba 6 area, parti pafo y paden di e cas. Areanan specifico ta construccion sostenible, referiendo na construccion di casnan similar na casnan existente, sinembargo lo introduci
adaptacionnan basico, por ehemplo construi e cas teniendo na cuenta e clima
di nos isla pa mantene e temperatura di e cas mas fresco y agradable. Otro
areanan cu lo explora ta energia renovable, balansa di demanda riba grid, re-uzo di awa, vehiculo electrico y e aspecto humano. E construccion di e infrastructura ta den man di Arubaanse wegenbouw y e construccion di e casnan ta den man di ALBO. Ta planea pa entrega e casnan pa fin di e aña aki. E proyecto piloto unico na Aruba ‘Smart Community’ ta consisti di un consorcio di 7 partner: Gobierno di Aruba, FCCA, WEB Aruba, Elmar, Setar, Utilities Aruba y TNO.
FCCA ta encarga cu e maneho di e vivienda den Smart Community. Den e cuadro aki lo inicia na su debido tempo un proceso di solicitud pa personanan cu ta desea di biba den e Smart Community.