Minister Chris Romero tambe a tuma nota riba un app cu a wordo lansa pa brinda un servicio na nos taxinan local. E mandatario kier a remarka cu e app aki bao di ningun circumstancia tin nada di haber cu gobierno di Aruba, ni tampoco su persona encarga cu transporte publico a duna ningun momento un permiso pa algo asina, ni tampoco algo parecido. “Esaki ta algo completamente priva y ta na cada taxista pa dicidi si nan ta afilia nan mes na e aplicacion aki si of no”, minister Romero a remarka.
Algun taxi a yama departamento di transporte publico pa haci algun pregunta, y di biaha esaki a cay manera un sorpresa pa e departamento. E mandatario a reuni caba cu algun di e diferente gruponan di taxista caba. Masnoticia a puntra e mandatario si ta permisibel pa habri un app asina of si esaki ta miho pa cay bao di un agencia di taxi, cual e mandatario a contesta cu na prome luga su consehero huridico ta tirando bista riba esaki wak kico por y kico no por. “Mi por bisa si cu cada permiso ta di Land Aruba, un persona cu kier haci e mi ta kere conhuntamente cu gobierno, a base di ley por wak kico por wordo haci.
E consehero huridico ta bezig ta wak esaki pasobra mi tin entendi cu cierto transaccionnan, mi a wak cu banconan internacional involucra cu esaki”, minister Romero ta splica.
E ta sigui bisa cu si ta asina cu pagonan ta bay internacional, con e ta bin bek Aruba pasobra akinan bo mester tin permiso di Centrale Bank caminda MOT tambe lo haci su trabao. No ta zomaar bo ta haci transferencia internacional sin permiso pa por haci esaki. Esaki ta preguntanan cu e departamento di transporte lo haci pa mira e legalidad pa por tin algo asina.
https://www.facebook.com/masnoticia/videos/1048901025562534/
Regulacion pa lansamento di app?
Masnoticia a puntra e mandatario tambe si nan a pensa riba algun reglamento pa no bin un tipo di ‘free for all’ ora di ta lantando e tipo di appnan aki. E minister ta contesta cu pa basta tempo el a premira esaki anto a trece dilanti pa bin cu un aplicacion pa Taxi pa gobierno hunto cu nan traha riba dje.
“Nos ta biba primordialmente di turismo, cu un aplicacion cu mi a yega di menciona varios biaha, bo tin siguridad, pa cu e taxista y pasahero, bo sa sigur ken ta yega busca bo. Por ehempel, nos ta kere cu mester tin e nummerplaat poni riba dje, ken ta bin busca bo, y bo por brinda servicio mas miho”, minister Romero a remarka, agregando cu dos aña pasa el a menciona esaki anto COVID19 a presenta pero nan tabata bezig cu ne caba.
Esaki ta un servicio obtenibel internacionalmente caba ora bo ta papia di UBER, Swift, City Taxi y mas, turismo tin custumber di e servicionan aki cu ta wordo duna pasobra bo sa nan ta safe y registra.
“Si mi ta pensa cu unabes bo ta wak cu e permisonan ta di pais Aruba, pa kico no laga nos conhuntamente cu e taxistanan, regla algo pa bo tin algo netjes hinca den otro. Pa elimina free for all e solucion ta bin pa bin cu uno di nos mes pa e taxistanan cu ta uza permiso di land Aruba ta cay bao di dje, y mi ta kere lo ta mucho mas atractivo pa nan tambe en cuanto cu prijs, algo cu sigur lo por elimina e tipo di problemanan aki”, e mandatario a conclui.