Diamars mainta a drenta a lamentabel noticia cu e conocido presentado di noticia, locutor, cantante Sr. Ruben Trapenberg a fayece di un atake di curason.
MUSICA
Sr. Ruben Trapenberg ta un persona hopi conoci den nos comunidad. E tabata gusta su musica rock y reaggue.; Durante temporada di carnaval e tabata presenta bou di e nomber “Mighty Hippy”, cu su “dreads” bisti na su red, gold & green.
LOCUTOR Y PRESENTADO DI NOTICIA
Ultimo añanan el a bin ta labora na television. Primeramente na ATV y ultimo añanan tabata presentador na Tele Aruba. Tambe e tabata locutor na varios radio y ultimo e tabata presentado di noticia tambe na Hits 100 FM.
SALUD
Durante campaña electoral di 2017, Ruben Trapenberg a fungi como moderador den e debatenan politico di Camara di Comercio. Despues di eleccion, na october 2017, el a sinti su mes malo. El a wordo interna na hospital, y inicialmente tur hende lo a kere cu ta ataca di curason lo el a haya. Tambe a pensa ariba e posibilidad di piedra, pero a scan su curpa y a realisa varios otro test. Resultadonan di e test a duna cu su problema tabata hopi mas serio di loke tur hende a pensa, caminda cu el a wordo diagnostica cu e tipo di cancer “lymphoma non-hodgkin”.
HULANDA
Dia 3 di januari 2018, despues di mas o menos 3 luna di hospitalisacion y intervencion medico di Dr. Jonkhoff y cu yudansa di AZV, a dicidi pa transporta Ruben Trapenberg pa Hulanda pa sigui tratamento avansa contra cancer lymphoma non-hodgkin.
Na Hulanda el a wordo interna den Erasmus Medisch Center na Rotterdam mesora y ey a topa cu otro Arubianonan cu tambe ta haciendo e mesun tratamento ey.
ARUBA
Tabata na luna di Juni, cu e cantante, presentado y locutor a informa cu e ta bek na su pais, Aruba. El a informa cu su tratamento a bay bon y cu e cancer tabata bou di control. En corto, cu su salud tabata bon pa cual el a gradici Señor!
FAYECIMENTO
Diamars mainta a drenta e tristo noticia cu Ruben a fayece di un atake di curason. Condolencia na su señora, yiunan, famia, amigonan y coleganan den e momento dificil aki. Cu Ruben sosega na paz.