Awe Aruba a keda den shock, ora cu a drenta e tristo noticia cu un baluarte local, e conocido comentarista deportivo y comerciante, Fouad Daou, conoci como Eddie, a bisa ayo n’e mundo terenal y drenta den reino di Papa Dios.
Eddie Daou tabata un comentarista di renombre, kende tabata nara e weganan deportivo di importancia, mas tanto e weganan di Grandes Ligas como tambe e weganan importante local y di e region.
Prome cu el a establece na Aruba mas di 35 aña pasa, e tabata biba na Corsou, caminda cu el a lanta y a practica e deporte cu tanto el a stima, cual ta baseball y hasta, despues di a cumpli su 33 aña, el a sa di maneha un ekipo eynan.
Eddie Daou ta for di descendencia Libanes, cu a sa di a laga un marca atras, tanto den deporte como den comercio, cu despues cu el a bandona nos isla ruman, a sa di complace e consumidor di mas exigente cu su mercancia di bon calidad, antes den Columbusstraat (ex-Wongco) pa despues muda bay Santa Cruz, na Macuarima, caminda cu te dia di awe ta brinda un servicio excepcional.
Na su famia y yiunan, su amigonan, su coleganan deportista y tambe su empleadonan, MasNoticia ta extende su mas sincero palabra di profunda condolencia. Cu Eddie, sosega na paz.