E tabatin 74 aña y tabata activo ainda. E fayecimento di Atan Lee awe den oranan di mainta a cay pisa pa famia.
Según por a comprende, ora cu a bay lant’e for di soño a constata cu e no tabata reacciona. Mesora a avisa yiunan y ambulance. Pero ya caba el a fayece.
Atan Lee ta un persona conocí rond Aruba y den Reino. El a yega di ocupa e funciona di hefe di Protocol di Gobierno. A duna diferente curso den e área ey. Tabata envolvi den certamennan di beyeza, unda e tabata prepara e candidatanan riba diferente tereno. Pero tambe e tabata skirbi, cuminsando tempo di Revista Amistad.
No solamente esey, e tabata un empresario tambe. E ta propietario hunto cu su famia di Peanut’s Restaurant na Playa.
E tabata activo riba terreno di política, cu tabata un di su pasionnan, manera traha pa Aruba y su hendenan.
Na su esposa, tres yiunan y demas famia, ta bay palabra di condolencia y hopi forsa cu perdida di un gran Arubiano.