Quincy ta un hoben di 24 aña di edad. Su disciplina ta ‘salto largo’ dentro di campo di atletismo.
For di 2013, e ta un Campeon Nacional den salto largo y ta mantene un record di 7.72 meter y actualmente ta un Atleta Arubano elite den Altetismo. Quincy a cuminsa cu atletismo na un edad relativamente avansa compara cu otro atletanan cu el a competi cu nan di rond mundo.
Esaki no a stop Quincy pa e por logra su metanan den su carera relativamente cortico.
Quincy ta finalista den tanto e weganan Centro Americano y di Caribe na 2014 y e Weganan Pan Americano na 2015. Sin menciona tur e otronan competencianan rond mundo, unda Quincy a pone su mes y mas ainda Aruba riba mapa mundial. El a logra tur esaki sin of cu e minimo ayudo y sosten financiero pa prepara su mes riba un nivel halto y trahando full time. Esaki ta un ehempel y ta un muestra cu e tin un talento y mester solamente ser guia den e direccion corecto door di e grupo of trainer profesional. Tur esaki cu e meta di yega mas leu cu ta posibel y tambe pa mi pais den region y mundialmente.
Quincy ta convenci cu, cu un training riba nivel halto y e coaching corecto, e por ta e atleta cu e miho perspectiva na e IAAF World Champion na London na 2017. Tambe na e Odesur Championship na Cochabamba, Bolivia, na 2018, E weganan Central Americano y di Caribe na Barranquilla, na Colombia na 2018 y e Weganan Pan Americano na Lima, Peru na 2019. Finalmente e importantisimo weganan Olimpico na Tokyo, Japon na 2020. Quincy no ta spera cu su exito lo bin facilmente pero e ta hopi determina cu y disciplina cu e meta pa keda enfoca den su preparacion y sigui crece den su sport.
E no a logra clasifica pa motibo di un paar di centimers, pa e Weganan Olimpico na Rio de Janeiro, Brasil e aña aki (2016), apesar di tampoco tabata bou di e guia adecuado. Quincy lo kier evita pa esaki bolbe sosode rumbo e proximo Olimpiada. Pa es motibo aki e kier cuminsa na tempo cu su preparacionnan.
E ta dificil pa e por logra tur esaki sin ningun ayudo financiero, pa e motibo aki e ta pidi encarecidamente si cualkier compania ta dispuesto pa yud’e of sostene pa su fundraising “Jump For A Dream”. E fondo pa e Bingo aki lo bay completamente na e gastonan di su training y acomodacion na un facilidad di training internacional. Cualkier sponsor pa cu e bingo aki sea den forma financiero; di producto of otro servicio ta bonbini y hopi aprecia.
Nomber y logo di compania cu ta sostene lo ser menciona na e fundraising aki y tambe riba e flyernan.
Tur otro idea pa cu e “Jump For A Dream” ta bonbini. E actividad aki no ta solamente ta habri porta pa Quincy pero tambe pa tur e hobennan cu ta kere cu no tin suficiente ayudo y sosten pa nan por sigui yega na nan soño y metanan.
Quincy ta convenci cu esaki lo beneficia tur partido concerni y envolvi. Ta di spera cu bo compania lo kier sponsor y sostene e actividad aki.
Pa mas informacion por tuma contacto cu Quincy Breell na telefon 744 8671 of tambe na email: [email protected]