Museo Arqueologico Nacional Aruba – MANA ta ofrece un oportunidad di conoce nos artista local Trudy Lampe y haya su splicacion di e exposicion menciona. Tambe tin oportunidad pa mira e documentario nobo di artista Ken Wolff cu ta trata e forma y filosofia di crea di Trudy Lampe. Ademas tin un presentacion filma cu arkeologo Harold Kelly cu ta brinda bishitantenan mas informacion di e cambio di terminologia arkeologico di Pre-ceramico pa Arcaico (period di e prome habitantenan). Muchanan te 12 aña por traha obra di man relaciona cu cultura Indjan.
Luna pasa artista local Trudy Lampe a habri e exposicion temporario “Di Tera Nos ta bin y Di Tera nos ta bai” na MANA. E exposicion aki ta hopi fasinante y specialmente pa nos dia nacional Trudy Lampe lo ta presente pa conta e bishitantenan di su obranan. Door di Covid un cantidad limita di persona por ta presente den cada espacio di MANA. Pa e encuentro cu Trudy Lampe lo traha cu un sistema di pre-registracion. Por fabor yama 582-8979 pa duna nomber y cantidad di persona interesa.
Hardinnan di MANA tambe ta habri pa bishitantenan, na unda por admira algun obra di arte den aire liber. Fuera di e obra di arte cu MANA a haya recien “Promesa y Speransa” di Trudy Lampe den e “Hardin di mi wela”, bishitantenan por admira e obranan di arte di Ciro Abath y Ryan Oduber den hardin di MANA.
Specialmente pa e dia di Himno y Bandera lo presenta e documentario “KimaTerra 2” di artista y yiu di Trudy, Ken Wolff na MANA. E documentario aki, cu a ser realisa cu sosten di UNOCA y Banco Central Aruba, ta transmiti e pasion di Trudy pa su arte y e conexion entre Trudy y e tera di nos isla.
Manera custumber MANA ta habri riba e dia aki cu un orario adapta di 10’or di mainta pa 2’or di merdia. Tur bishitante mester tene su mes na reglamento di DVG y sigui instruccion di personal di MANA. Museo Arqueologico Nacional Aruba ta invita tur esnan cu ta interesa den nos pasado indigena y actividadnan varia pa bishita nos libremente y pasa un tempo ameno riba nos dia nacional 18 di maart. MANA ta ubica den Schelpstraat 42 den e compleho di edificionan historico di famia Ecury combina cu e edificionan moderno. Sigui nos riba Facebook Museo Arqueologico Nacional Aruba y Archaeological Museum Aruba pa mas informacion.