Conoce Laurenne Croes cu ta interpreta e personahe di Samanta Ras, un hoben insigur cu ta bay door di un cambio unda tur cos lo bay robes. Laurenne tin 17 aña di edad. E ta studiante di economia na EPI. Su pasa temponan faborito ta: canta, actua y e ta gusta baila masha hopi mes.
E manera cu Laurenne a logra un rol den Ciudad Oraño: Na aña 2015 el a join “Into Acting Youth Club” bou direccion di Juan Fransisco Pardo. Den e club tabata tin diferente casting pa diferente rol y asina el a keda escogi pa un rol den Ciudad Oraño. E rol den Ciudad Oraño ta su prome biaha cu e ta actua.
E rol cu Laurenne tin ta di un mucha muhe hoben sin experencia. E ta confronta loke e hubentud ta biba aden awendia. Asina tambe e mucha muhe a bira rebelde y constantemente ta enfrenta problema na cas cu su mayornan. E no tabata un rol facil pa Laurenne, pero cu e bon guia y instruccionnan cu e tabata haya di e productor y director Juan Fransisco Pardo e ta pensa cu el a haci’e miho posibel. Un parti dificil tabata ta ora e tabata ta den un escena cu e mester yora y cu e tristesa riba su cara mester keda mustra real.
“Pa mi e tabata un gran experiencia na unda cu mi a siña cu bo mester tin hopi disciplina pa bo por logra bo meta. Locual mi a gusta tabata e momentonan cu mi a comparti grabando e produccion aki. Tabata momentonan divertido y inolvidabel”.
E storia di Ciudad oraño ta un storia basa riba diferente problemanan cu hubentud ta confronta cu ne awendia. E ta un storia educativo y tambe e ta pa conscientisa mayornan con pa atende cu nan yiunan den diferente situacion.
Di parti di Laurenne Croes, e ta invita un y tur pa yega diasabra 1 September pa 7 pm na Crystal Theater. E estreno lo ta den un forma hopi special “Gala Di Tapijt Cora” y pa asina tambe duna elogio na tur participantenan di Ciudad Oraño.