WASHINGTON, D.C., Merca- Un proyecto di ley di siguridad fronteriso cu lo mester ricibi e financiamento pa e construccion di un muraya entre Merca y Mexico, ya tin e apoyo di congreso Mericano, según Reuters.
Despues di casi tres siman di combersacionnan, e normativa cu lo duna 1.4 biyon dollar pa construccion di otro barera na e frontera, cual lo mester haya financiamento publico di casi 1.4 biyon dollar. E mocion aki a wordo aproba den Senado y Congreso. E proyecto a wordo apoya pa 300 miembro di e Camara Representativo, mientras cu 128 a vota contra.
Pa e documento aki ta valido, presidente di Merca, Donald Trump, mester firm’e prome cu diabierna ya cu gobierno a acepta un plan pa financia e actividadnan di congreso te cu 15 di februari. Den caso contrario, lo bin otro ‘shutdown’.
Di su banda, White House a confirma diahuebs cu Donald Trump lo firma e proyecto di ley di siguridad fronteriso y a declara estado di emergencia nacional pa financia e muraya na frontera cu Mexico.
“President Trump lo firma e proyecto di ley di financiamento di gobierno y, manera bisa anteriormente, e lo tuma otro medidanan ehecutivo, incluyendo e declaracion di emergencia nacional, pa garantisa e siguridad nacional y stop e crisis humanitario na frontera”, e secretaria di prensa di White House, Sarah Sandera a señala den un comunicado.
E declaracion di emergencia nacional lo permiti e mandatario Mericano di redirigi fondonan gubernamental pa financia su proyecto sin mester di aprobacion di Congreso.
Na december ultimo, despeus di un falta di acuerdo, gobierno a suspende su actividadnan durante 35 dia, situacion cu a laga casi un miyon di empleadonan publico sin cobra nan salario.