Mediador di Aruba, sr. Anselmo Pontilius ta papia di conflicto den trabou, e persona cu no lo haya trabou mirando cu negoshinan a cera y retiro boluntario cu dunado di trabou ta ofrece un pakete.
E ta bisa cu tabatin caso cu hefe di trabou kier a usa subsidio tambe pa hinca den e pakete di persona, pero esey no tabata mag. Tin compania cu ta prefera di reduci persona pa asina por sobrebibi e periodo di crisis.
Sinembargo cu indicacion cu lo extende e prome 6 luna di 2021, sr. Pontilius ta bisa cu ta importante pa gobierno, ministernan concerni, tur gremionan y sindicato atende cu e mercado laboral.
Ta keda bisa cu tin un sector cu ta keda mas severo afecta cu otro. Si no tin operacion manera tabata conoci, nan ta reduci personal, manera esnan cu tabata traha den casino cu ta cobrando na cas. E asunto di hotel tabata spera cu por bay mas halto den turismo.
“Por wanta cu subsidio, pero ta keda e pregunta di con halto e garantia ta, cu nos tin cu Hulanda. Nos sa cu Bonaire, Saba y Sint Eustatius tin fondo garantisa te cu juni 2021, nos ta abou di acuerdonan y kico mas lo implementa”, e ta bisa.
Pa e motibo aki sr. Pontilius ta bisa cu mester sinta hunto pa wak con e situacion por ta. E ta bisa tambe cu Departamento di Labor (DPL) ta haciendo un tremendo trabou pa asina pone hende den trabou.
Sinembargo e ta bisa cu no por lubida cu ta e sector turistico (hotel y restaurant) ta esun cu a haya mas consecuencia. E cantidad di persona cu a perde trabou no tabata traha directo cu e compania, sino cu contratista.
Ta spera cu tur persona cu a perde trabou di prome por a atende cu DPL pa asina nan por a haya trabou, sinembargo e ta bisa cu ta compronde cu no tin suficiente cupo di trabou. “E ta forsa nos como isla pa wak di cerca con ta atende cu e sector priva.”
Pa finalisa, sr. Pontilius ta bisa cu na momento aki cu compania ta ofrece placa pa e trahado bay, ta importante pa e trahado busca informacion pa sa kico ta na derecho, pa nan sa kico exactamente pa haci ‘acudi DPL of DAO pa busca conseho legal prome cu firma cualkier documento’.