Sentimento di e consumidor a permanece stabil den e di tres trimester di 2018. E Indice Confiansa di Consumidor a subi marginalmente na 94,2, un aumento di 0,4 punto di indice compara cu e periodo anterior, segun e ultimo resultadonan di e Encuesta di Confiansa di Consumidor (CCS) di Banco Central di Aruba (Grafiek 1) .
Consumidornan a bira negativo pa cu nan situacion financianiero personal actual, ya cu un indice cu a baha te na 95,1 (100,2 den e periodo anterior). E otro componentenan di e Situacion Actual a permanece pesimista y consecuentemente tabatin un caida den e Indice di Situacion Actual for di 94,3 te na 92,4 (Grafiek 2).
E Indice di Expectativanan a mehora cu 0,5 punto di indice na 93,5, unda cu consumidornan a raporta un bista menos negativo riba tur e componentenan di e indice cu excepcion di expectativanan di e posicion financiero di gobierno unda cu 43,9% a indica cu e esaki lo bira peor den e siguiente 6 luna (37,8% den e trimester previo).
E Indice di Habito di Consumo a mehora den e trimester bou di revision. Sinembargo, consumidornan tabata solamente positivo pa bai cu vakantie, probablemente causa pa e periodo di vakantie na october. Mientrastanto, e otro componentenan tabata un tiki menos negativo cu den e periodo di encuesta anterior. E gran mayoria di respondientenan (88,3%) ta anticipa cu prijsnan lo subi den e siguiente 6 luna resultando den un Indice di Expectativa di Prijs di 90,3 (periodo anterior: 90,1).
Resumiendo, e confiansa di consumidor stabil ta atribui pa gran parti na un subida den e expectativanan di consumidor y un mehoracion den e habito di consumo (Tabel 1).