Confiansa di e consumidor a baha den e di tres trimester di 2016 segun e ultimo resultadonan di e Encuesta di Confiansa di Consumidor (CCS) di Banco Central di Aruba (BCA). E Indice di Confiansa di Consumidor a sera na 96,0 pa e di tres trimester di 2016, un empeoracion di 0,8 punto di indice compara cu e trimester anterior. Un subida den incertidumbre pa futuro ta probablemente e factor principal afectando e confiansa di consumidor.
Tur e elementonan principal di e indice di confiansa di consumidor a deteriora. Consumidornan a evalua e situacion actual un poco mas negativo compara cu seis luna pasa ya cu e Indice di Situacion Actual a cai cu 0,5 punto di indice te na 94,8. Alabes, e expectativanan di consumidor tabata mas abou: e Indice di Expectativanan a empeora di 100,2 te na 99,6, yegando bek na un resultado pesimista despues di a bira optimista den e periodo anterior.
Consumidornan tabata tambe menos optimista riba e futuro cercano den e di tres trimester di 2016. E grupo di consumidornan cu ta spera cu nan condicionnan financiero personal lo mehora a cai di 37,0 porciento te na 35,1 porciento. Di otro banda, tabata tin un mehoracion den nan sentimentonan di, respectivamente, condicionnan di negoshi pa futuro (di 29,8 porciento te na 34,7 porciento) tambe den e posicion financiero di gobierno pa futuro (di 21,8 porciento te na 29,8 porciento). Esaki por ta relata na e efectonan di e re-apertura di e refineria pa futuro. Sin embargo, ainda tin mas consumidor (32,8 porciento) cu ta anticipa un empeoracion den finansa di gobierno. E percepcion di condicionnan laboral di consumidornan pa futuro a baha, ya cu 44,9 porciento di e respondientenan a indica cu expectativanan pa haña un trabou den futuro lo empeora (un subida di 4,9 punto di porcentahe). Tin cu nota cu 14,3 porciento a contesta cu nan no sa e expectativanan pa cu condicionnan di mercado laboral, cual ta e resultado mas halto desde e comienso di e CCS. Esaki por ta un señal cu tin incertidumbre rond di e mercado laboral.
Ademas, e indicenan di expectativa di prijs y custumber di compra di consumidor a empeora den di tres trimester. E Indice di Expectativanan di Prijs a baha te na 90,7 den e trimester bou repaso. A pesar di tendencianan deflacionario, e porcion di consumidornan indicando cu prijsnan lo ta mas halto den e siguiente seis luna a subi di 65,5 porciento te na 73,5 porciento. Finalmente, mayoria di consumidornan a indica cu no tabata apropia pa cumpra un auto (64,8 porciento), aparato grandi (49,0 porciento), haci un prestamo (70,8 porciento) of un hipoteca (76,8 porciento). Adicionalmente, maske tin un crecemento consistente den hipoteca, solamente 7,3 porciento a indica cu ta apropia pa haci un hipoteca, e resultado mas abou desde e comienso di e encuesta.
Resumiendo, e caida den confiansa di consumidor a wordo atribui na un bahada den tur componente di e Indice di Confiansa di Consumidor, pa gran parti debi na un crecemento den e nivel di incertidumbre.
Por obtene e resultadonan completo di e encuesta aki for di e website di BCA (www.cbaruba.org). Pa mas informacion por tuma contacto cu e Departamento di Research, na [email protected].