Pa prome biaha dia 22 di October Paaz conhuntamente cu Jordan Ling Foundation lo presenta “Mental Health Awareness Conference” pa asina papia tocante diferente aspectonan di salud mental cerca nos hobenan pero tambe cerca nos adultonan.
Pakico un conferencia asina ta asina importante pa Aruba?, Jeroen van Geest di departamento di PAAZ ta splica cu tin hopi hende cu tin un deficiencia pero ta scondi y tin miedo pa busca e ayudo cu nan mester. Y cu un conferencia asina por cuminsa kita e stigma cu tin tocante salud mental.
Misha Raymond ta Kinder en Juegdpsychologe na Dr. Horacio Oduber Hospital, e ta splica cu nan ta haya diferente tipo di señal cu ta duna indicacionnan cu tin problema psikiatrico y cu hopi biaha e ambiente di cas of scol di un mucha tambe tin un impacto hopi grandi riba e desaroyo psikiatrico riba un mucha.
Mw. Drs. Raymond ta splica e proceso ora tin un aanmelding cerca nan; “Prome nos ta traha cu un sistema di clasificacion cu ta duna un indicacion den ki rango mester pensa ora ta papiando di un problema psikiatrico. Nos ta traha cu mucha nan di 0 te cu 18 aña. Esnan riba 18 aña lo wordo referi na PAAZ. Tin diferente problema cu nos ta enfrenta, manera problemanan cu desaroyo y tambe problemanan cu por bin despues den bida por ehempel depresion, schizofrenia, psicosis, problemanan cu miedo. E situacion por ta asina amplio cu nos mester haci un investigacion, despues ta bin tratamento y semper despues ta bin e “na zorg” con bo ta sigui cuida e salud mental”. Durante e conferencia nos como instancia kier informa e pueblo kiko ta e señalnan cu mester wak p’e y na ki momento lo mester acudi pa ayudo cerca un profesional prome cu e problema bira mas grandi.
Durante e conferencia no solamante profesionalnan di PAAZ of Hospital lo ta presente pero diferente personanan cu ta traha pa diferente instancia cu ta traha hopi di cerca cu e pueblo manera Jesselyne Winklaar cu ta un “Bewoners Begeleidster” hunto cu FCCA, Silvienne Winterdaal cu ta un “Schoolmaatschappelijk werkster” kende ta traha directamente cu e muchanan na scol, y tambe lo ta presente Tony Cox e doño di Butterfly Farm cu ta yuda cu e parti di rehabilitacion. Pues diferente otro topico interesante lo wordo presenta durante e conferencia aki cual lo tuma.
Nos kier a invita pueblo completo pa registra pa asina tambe tuma parti di Mental Health Awarness Conference cu lo tuma luga dia 22 di October na Renaissance Convention Center pa 9AM te cu 4:30PM. Pa registracion por bishita nos riba Facebook Mental Health Aruba.