Despues di dos dia intenso na unda comunidad di turismo local y internacional a dialoga riba diferente topico cultural y di turismo, a clausura e Happiness 360 Conference den forma triumfante. Cu aproximadamente 500 participante local y internacional, e evento aki no solamente a inspira, motiva y educa tur esnan presente, pero tambe a duna frutonan positivo na pais Aruba. E conferencia Happiness 360 a logra habri portanan den diferente forma pa Aruba.
Un logro inmenso ta e relacion cu a wordo fortalece cu e organisacion UNWTO. E desaroyo turisitico na Aruba y e importancia cu ta wordo duna na e felicidad di Aruba su hendenan, ta wordo considera den liña cu nan maneho y vision. Cu UNWTO a papia di auditoria y educacion pa diferente sector den industria turistico. Tambe Secretario General di UNWTO, Sr. Taleb Rifai, a reuni cu 400 studiante di EPI Sector Hospitalario como tambe Universidad di Aruba, Sector Turistico. Aki el a duna un charla na e hobennan y demostra e importancia di felicidad como individuo pa asina forma un comunidad y consecuentemente un producto turisitico feliz. Na final di su charla el a otorga 4 beca pa sigui estudio na Madrid, Spaña na oficina di UNWTO na e 4 studiantenan di e dos scolnan menciona cu e miho prestacion den nan educacion.
Tambe durante e conferencia Aruba Tourism Authority y Curaçao Ports Authority a firma un MOU solidificando asina nan partnership pa locual ta turismo di crucero. Esaki ta inclui cu Aruba, hunto cu nos hermana isla Corsou hunto por ofrece su wafnan como destinacionnan conhuntamente na liñanan di crucero den nan rutanan comercial. E intermediacion di A.T.A. cu su relacionnan estrecho cu industria crucero ta añadi na potencial di eleva calidad den resultado di negociacionnan.
Un di otro noticianan grato ta e resultado di un estudio recien di ‘Quality of Life’ cu ta sugeri cu nos “One Happy Island” en realidad ta un di e islanan di mas feliz na mundo. Despues di a conclui un estudio di un duracion di 5 aña den partnership cu Aruba Tourism Authority y Rosen College of Hospitality Management na the University of Central Florida, a confirma cu 78% di e populacion di Aruba ta contento y 76% tambe ta expresa un satisfaccion a largo plaso pa cu nan bida.
E ‘World Happiness Report’ di 2016 di Nacionnan Uni, cu ta midi e ‘Happiness Index’ di 157 paisnan mas grandi na mundo, a wordo usa pa midi y compara diferente paisnan cu otro. Akinan Dinamarca su ‘Happiness Index’ a califica cu un 75.3%. E resultado ta cu Aruba, como isla ta score mas halto cu Dinamarca.
“Como e pais number 2 na mundo cu mas ta depende di turismo, Aruba ta mira e importancia di su hendenan. “Nan ta parti di Aruba su alma y curason y ta sigura e calidad di e experiencia turistico cu a y ta defini nos destinacion”, CEO di Aruba Toursim Authority, Ronella Tjin Asjoe-Croes ta elabora. “Nos ta evalua e exito di nos turismo no solamente pa medio di cosnan tangibel, sino tambe cosnan intangibel manera felicidad y satisfaccion y bienestar di nos localnan.”
Happiness 360 tabata un conferecia exitoso na unda banda di esnan presente, mas di 13,000 persona rond mundo a presencia e evento aki via Live Streaming. Aruba su posicion como lider turisitico a wordo eleva mundialmente inspirando partnernan turistico global pa enfoca riba turismo sostenibel, poniendo entre otro felicidad di e sernan humano central.