Conferencia di Homber cu compromiso

Awe ta tuma luga un conferencia / encuentro specialmente pa hende homber. E tema di e conferencia aki ta Homber cu Compromiso. Esaki ta loke cu Teo Croes a splica den un declaracion.

Intencion di e conferencia aki ta pa haci of educa e hende homber pa nan ta personanan cu ta cumpli. Por medio di testimonionan lo mustra e hende hombernan con nan tin cu comporta nan mes pa cu nan mes, nan famia, iglesia y comunidad. “E homber mester tuma liderazgo na cas. Liderazgo no kiermen duna ordo, pero duna guia na bo famia, duna casa siguridad, duna yiu(nan) direccion (guia). Esaki ta e base di e conferencia.”

E encuentro aki ta habri pa tur hende homber, e no ta pa un religion specifico. Simplemente e participante mester ta un hende homber cu kier transforma y bira un miho ciudadano. E reunion lo ta na Iglesia Tabernakel (Una Nueva Vida), San Barbola (pariba di Cliffix). E lo cuminsa pa 6.30 di atardi.

Croes ta haci un apelacion na e hende muhenan pa encurasha nan pareha of ruman pa participa, pa scucha e oradornan. E orador principal ta un profesor evangelista conoci pa duna palabra di aliento y enseñansa kico mester haci como hende homber. Semper ta bon pa scucha di otronan y bira un miho persona.

Entrada ta completamente gratis.

 

 

Comments

comments