Diasabra, pa mas of menos 1’or y 47 di marduga, patruya di San Nicolas a wordo manda door di Central na altura di La Granja na Savaneta, caminda cu e conductor di un jeep biña lo a dal un auto den area di playa y despues a sigui core bay. Central a indica via portofoon, cada biaha unda e conductor tabata core. Segun cu Central a meld, cu e conductor tabata core direccion Cura Cabay, na altura di e negoshi antes yama Surfing Banana. Yegando na Cura Cabay, Central ta meld cu e conductor a paga luznan di e auto. E conductor a sigui core riba e caminda principal luz paga. Patruya a sigui e auto y a por a par’e na altura di un cas na Noord Cura Cabay. Nan a duna opdracht pa e conductor y e pasahero, pa sali for di e auto. A base di esaki, e condcutor yama ANM, a wordo atendi. Por a haya den e auto Daihatsu Rocky, un tas color preto cu blauw cu marihuana den dje y algo di placa. A base di esaki tambe, e homber Jv/dB tambe a wordo atendi. Ambos a wordo hiba warda di San Nicolas, caminda cu nan a wordo presenta dilanti di fiscal auxiliar. ANM a keda deteni pa mas investigacion. E auto a wordo confisca pa mas investigacion cu e caso di hit & Run y a wordo poni na warda di San Nicolas.