Desde November 2004, Pais Aruba (Gobierno) a introduci e condicionnan general cu ta aplicable ora Gobierno cumpra material y adkiri servicio di comerciante. E condicionnan ta conta pa tur comerciante cu ta bende material y duna servicio na departamentonan gubernamental. E comerciantenan conoce e condicionnan aki como AV 2006. A actualisa e condicionnan na 2006 y deposita na Griffier di Corte den Promer Instancia.
Ariba e bestelbon di gobierno, conoci como inkooporder of purchase order, e comerciantenan y suministradornan di servicio por tuma nota di e condicionnan aki.
Den e AV 2006 ta menciona entre otro e siguiente condicionnan:
compra di material y adquisicion di servicio ta sosode pa medio di un bestelbon (inkooporder of purchase order);
facturanan mester ta acorda; e termino di pago ta en prinicipio nobenta dia; e aplicacion di derecho ta leynan di Auba;
e huez autorisa den caso di eventual conflicto ta e huez di Corte den Instancia;
ta desconta debenan di impuesto atrasa ora di paga comerciante.
Tambe a incorpora e procedura pa adquisicion manera prescribi den e Reglamento pa demas administracion financiero.
Lo publica e AV 2006 den Landscourant di Aruba pa e suministradornan, comerciantenan den exterior tuma nota di e condicionan ya cu e condicionan tambe ta conta pa nan.
E publicacion di AV 2006 tambe lo ta bay den forma digital ariba e website di gobierno. Pa medio di aviso den corant local, lo informa tur comerciante mas en detaye tocante e condicionnan. Pa mas informacion por tuma contacto cu Departamento di Finanzas via e-mail [email protected] bou mencion di AV 2006.
Aruba Marriott CARE Foundation activo den nos comundidad
Aruba Marriott CARE Foundation recientemente a organisa un atardi caritativo riba dia di san valentino unda miembronan di Aruba Marriott CARE Foundation a bishita e casnan di anciano; San Pedro na Playa, Huize Maris Stella na Savaneta y Centro di Cuido na San Nicolas, pa asina parti cupcakes di san valentino pa e residentenan. E boluntarionan ta miembronan di Aruba Marriott CARE Foundation kendenan ta empleadonan di Aruba Marriott Resort & Stellaris Casino, Marriott’s Aruba Ocean Club y Marriott’s Aruba Surf Club cu a yuda durante nan ora di trabao y a logra parti 300 cupcakes. E boluntarionan a laga sa di ta sinti hopi bon y contento di por ta parti di e actividad aki door di pasa un rato ameno cu nos grandinan y di por yuda comunidad di Aruba. Un gradicimento special na All Starz Tours pa a sostene e iniciativa aki door di ofrece transportation por nada na e boluntarionan.
Sigientemente dia 23 di Februari 2017, miembronan di Aruba Marriott CARE Foundation hunto cu empleoadonan di Aruba Marriott Resort & Stellaris Casino, Marriott’s Aruba Ocean Club y Marriott’s Aruba Surf Club y AHATA a tuma un mainta pa asina hasi un “neighborhood clean-up” den e bario di Seroe Janchi serca di e dam. E area aki tabata hopi sushi pero a logra hasi esaki limpi acumulando full un container di 20 pia di sushi y tambe mas di 30 taira.
Ademas di limpiesa, Aruba Marriott CARE Foundation ta brinda asistencia na fundacionnan y organisacionnan den nos comunidad por medio di verf y renoba sedenan y ta hasta haci gestonan special manera esun di dia di san valentino.
Marriott Care Foundation ta conta cu sosten di no menos di 650 empleado di e hotel y casino cu tur luna ta contribui den un fondo for di nan salario propio pa haci actividadnan manera esaki. Ta yuda diferente fundacion durante aña. Nan ta haya peticionnan y nan ta evalua cual ta esunnan cu ta pas bon cu e filosofia di e compania. E mesun empleadonan di e hotel a funda Marriott Care Foundation na aña 1999, cu awor ta contribui na comunidad di Aruba pa 18 aña caba. Dunando bek na comunidad ta lanta e sintimento di “Spirit to Serve” den cada empleado cu ta sostene e fundacion door di contribui financieramente y tambe fisicamente.
Aruba Marriott Resort & Stellaris Casino a habri na aña 1995 cu 411 camber. Na aña 1999 a habri Ocean Club cu 311 camber y na aña 2004 a habri Surfclub cu 900 camber. Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.