WASHINGTON/BRASILIA/NEW YORK – E decision di autoridadnan Venezolano pa bolbe encarcela e opositornan Leopoldo Lopez y Antonio Ledezma, cu tabata gosa di aresto domiciliario pa su protestanan contra e Gobierno, a ricibi diamars un fuerte condena den e ambito internacional.
Un dia, despues di decreta sancionnan contra e presidente Venezolano, Nicolas Maduro, Merca a reacciona awe cu un duresa maximo na e detencion nobo di ambos opositor, cu a wordo saca for di nan cas door di polis.
“Merca ta condena e accionnan di e dictador (Nicolas) Maduro,” e vocero di Donald Trump, Sarah Sanders, a bisa den un rueda di prensa den Cas Blanco.
No solamente Cas Blanco a pronuncia awe riba e aresto di Lopez y Ledezma. Tambe e Departamento di Estado a haci esaki. Su titular, Rex Tillerson, a cualifica e detencionnan “tabata hopi alarmante” poco prome cu Sanders a papia riba Cas Blanco.
“Nos ta hopi hopi preocupa,” e hefe di e diplomacia Norte Americano a bisa, kende a indica cu e administracion di Donald Trump ta evalua e pasonan cu e lo tuma awo den e crisis Venezolano.
Di su parti, e Gobierno di Brazil a insisti awe na e autoridadnan di Venezuela pa libera “inmediatamente” Lopez y Ledezma.
“Encarcelamento di e dos opositornan mas importante di e Gobierno di e presidente Nicolas Maduro, ta un demostracion di falta di respet na e libertadnan individual,” Canciyeria Brasileño a señala den un comunicado den cual el a reitera su criticanan na Caracas.
E canciyer di Chile, Heraldo Muñoz, a pidi awe e cabamento di e “detencionnan arbitrario” na Venezuela y a solidarisa cu e dirigentenan opositor. “No mas detencion arbitrario sino negociacion real y efectivo,” Muñoz a skirbi riba su cuenta di Twitter.
“Paz, democracia y libertad di e presonan politico mester ta inkebrantabel. Spaña, cu e pueblo Venezolano,” e presidente di e Gobierno Spaño, Mariano Rajoy, a tweet di su parti.
E secretario general di Nacionnan Uni, Antonio Guterres, a insisti awe na tur e partinan involucra den e crisis na Venezuela, pa busca un solucion politico na e conflicto.
“Na e momento critico aki pa e pais, e secretario general ta pidi na tur e Venezolanonan en particular na esnan cu ta representa e podernan di Estado, pa haci tur esfuerso posibel pa alivia e tensionnan, impedi mayor violencia y perdida di bida, tambe pa haya maneranan pa dialogo politico,” e vocero Stephane Dujarric a señala, DPA ta cita.
Lopez, e preso politico mas emblematico na Venezuela, a wordo traslada na aresto domiciliario dia 8 di Juli, despues di a wordo condena na 14 aña di prizon pa acusacionnan di instiga protestanan violento contra e Gobierno na 2014.
Ledezma, alcalde di Caracas, a wordo encarcela na 2015 y tambe tabata den aresto domiciliario pa motibonan di salud.
Autoridadnan Venezolano a hustifica awe e traslado di ambos na prizon bisando cu nan no a cumpli cu e normanan di nan detencion domiciliario haciendo pronunciamentonan politico.
Ambos lider opositor a publica video di rechaso na e eleccion di e Asamblea Constituyente cu a tuma luga diadomingo, cual nan ta considera como un intento di e Gobierno di Maduro pa deactiva e Parlamento, controla pa oposicion y establece un dictadura.
E casa di Lopez, Lilian Tintori, a publica awe un video caminda cu por mira agentenan sacando e opositor for di su cas den oranan di marduga.
E famia di e alcalde a difundi un otro grabacion cual por a mira con nan a saca Ledezma cu forsa for di su cas, na piyama.
E eleccion di e Constituyente di diadomingo a genera ya un amplio condena internacional, entre nan paisnan di e region manera Brasil, Argentina, Colombia, Mexico, Chile y Peru, mescos cu Union Europeo y Merca.
Fuente: www.eluniversal.com