Den un sala di Renaissance Convention Center “sold out” cu un audiencia masha anima, como 25 musico local a toca y canta pa rindi homenahe na e bastionnan Curazoleño di musica, Rudy Plaate y Norman Moron. E ambiente festivo berdaderamente a duna un extra dimension na e anochi musical.
Robert Thiel a cuminsa e anochi cu “Atardi”, un di e piesanan mas stima di Rudy y esaki a habri e apetito ainda mas di e audiencia cu ya tabata hambra pa musica di e compositor. E resto di e programa lo a satisface cualkier audiencia, pero pa esun di diasabra nochi no tabata suficiente. Nan hamber pa musica di Rudy Plaate tabata parce insasiabel.
Algun mas cu otro, pero tur grupo y artista, a resalta den nan manera, cu e piesanan cu nan a scoge pa interpreta. Algun momento extra-memorabel: Doedel Sofia cu su cuatro compañando Albert Croes riba piano; Rachel Kraaivanger interpretando cu hopi melancolia e piesanan “Felicidad” y “Esperansa”; e inimitabel Etty Toppenberg, cu a desvia di e programa cantando “Ki ora mi corda” di Padú Lampe, e unico cantica e anochi ey cu no tabata di Rudy Plaate, pa dedik’e na Norman y Rudy.
Tabata un placer pa mira Padú gosa asina tanto sinta riba su rolstoel adilanti den skina banda robes. Tambe ex Gobernador Olindo Koolman y su simpatica señora Dora a impresiona cu nan presencia. Kico e lo tabata pensa ora cu Papito a cera e concierto cu “Si mi bira gouverneur”?
Na nomber di Minister di Cultura, Señor Dumfries, Director di Departamento di Cultura a otorga plakkaat di reconocimento na e homenaheadonan. Michael Kuiperi y Netto Arends kendenan a tuma e iniciativa di organisa e concierto di homenahe y Persey Jeandor kende a traha duro pa realisa e concierto, tur tres merece un danki grandi di nos comunidad pa un celebracion di nos cultura musical.
Ta un lastima cu e sistema di zonido (sound system) no tabata na nivel di e artistanan. E tabata laga hopi di desea y varios bes e tabata malo, hopi malo, completamente malo. E tabata un berdadero mancha mahos riba e concierto.
N.B.: Pa via di un problema cu mi lomba mi no por a ta presente na e concierto y e articulo aki ta un compilacion di opinionnan di hendenan cu si a asisti e concierto cu ami a entrevista despues.
Mi tabatin e privilegio di combersa personalmente cu Rudy y Norman diadomingo mainta na un reunion familiar na honor di e dos artistanan y tur dos a expresa nan gratitud y admiracion pa e organisadornan y e publico Arubano cu a mustra un pasion grandi pa nan musica. E concierto a surpasa tur nan expectativo. Mi a puntra nan con nan ta compara e homenahe aki cu esun cu nan a ricibi na cuminsamento di aña na Concertgebouw di Amsterdam, un di e casnan musical mas venera den mundo. Nan opinion ta cu esun di Aruba tabata completamente diferente: mas intimo, entre amigo y conocinan y esaki a haci’e mas personal.