Dia 28 di november proximo FADA lo tin su concierto caricativo ariba Freewinds, pa asina recauda fondo pa e proyecto #AmigoDidi. Sra. Rulienne Arends, Trahado Preventivo di FADA cu e relato.
E anochi aki ta conta cu presencia di Edjean Semeleer, Jeanedy Semeleer, Roderick Franken y por ultimo e grupo di gaita Las Unicas Fabulosas, cu lo cera e anochi cu’n sorpresa. E evento aki lo tuma luga ariba e barco Freewinds.
E recaudacion di fondo ta bay specialmente pa e campaña #AmigoDidi, cu ta cumisna den e temporada di Pasco y di biaha den 2019, pa loke ta carnaval. Nan ta sigui cu e campaña, lo tin diferente clipnan cu lo wordo graba y tambe diferente mercancia cu lo wordo bendi. Y asina e campaña lo ta pa conscientisa e publico pa cu e #AmigoDidi
FADA no ta activo solamente den e periodo di fiesta, pero tambe tur weekend nan ta wak cu ainda cu tin hopi hende cu ta bebe alcohol y ta scoge pa bay tras di stuur. Aki ta caminda cu mester cuminsa para keto y p’esey e campaña #AmigoDidi. E campaña no ta pa stroba niun hende pa bebe alcohol, e ta keda na cada ken pa tuma e responsabilidad. Pero si nan kier conscientisa tur hende cu si nan sa cu nan ta bay sali y cu nan ta bay bebe bebida alcoholico, bin cu’n otro persona cu si por stuur, no solamente pa e persona en cuestion, sino tambe pa otro automobilistanan cu ta bayendo cas despues di trabao, pa nada no pasa pa otro hende tambe. P’esey e campaña ta di hopi importante.
Carchinan pa e anochi aki ta obtenibel na FADA, na Campanastraat # 9 pero tambe por haya na Citgo Boulevard y tambe na Gallo Rojo. Pa solamente 50 florin, bo lo contribui cu e campaña di #AmigoDidi y tambe ta gosa di nos mesun artistanan local, cu canticanan nobo di fin di aña cu nan lo presenta. Tambe Las Unicas lo tin un sorpresa pa e anochi aki.
E actividad lo tuma luga ariba Freewinds, pa 7 or y 30 di anochi. Si pa un motibo of otro, un persona no por pasa cumpra su carchi, FADA lo por pasa entrega esakinan tambe.