Levi Silvania tabata na Aruba recientemente cu un serie di concierto organisa pa Ministerio di Enseñansa. Un total di 1700 alumno di scolnan secundario rond Aruba a presencia e concierto unda cu e artista a combina musica y film cu e tema “Sigui Stima”.
Silvania ta bisa cu e concierto a nace for di e inspiracion y meta pa pone un spiel dilanti e miembronan di publico pa nan mira nan mes, nan grandesa y e potencial cu nan tin. El a splica cu tur persona tin influencia riba otronan, y esaki mas ainda ta berdad ora ta e persona ta un artista, of musico, y e kier a inverti bek den comunidad pa medio di e influencia y reach cu e tin pa purba “enlighten” su publico pa lanta nan auto-estima, pa inspira y motiva nan pa “haci”.
Levi Silvania a expresa cu e concierto no ta tocante musica, y no ta tocante di dje personalmente, pero reconociendo e “reach” di e influencia di e individuo riba otro individuo of personanan y su creencia firme cu nan momento cu “enlighten” un individuo cu positivismo, e ta bay crea resultadonan.
Na momento cu tin individuonan cu kier “haci” biniendo for di positivismo, e ta crea resultado.
Silvania a agrega cu e ta kere cu comunidadnan ta resultado di e individuonan, y ta puntra cu speransa y positivismo den su voz pa tur persona imagina nan mes kico ta pasa si yega na e individuonan cu un mensahe di “enlightenment”, “empowerment” y inspiracion positivo.
E proceso pa crea e concierto aki a tuma su tempo, y hopi energia, un bon energia cu e publico ta sinti y ta bay cas cun’e.
Su mensahe principal pa cada miembro di e comunidadnan cu e bishita ta: “Everything you need, you are. Be! Just be! Confia y tene na dje.”
Levie Silvania a gradici Minister di Enseñansa Michelle Hooyboer-Winklaar pa e oportunidad, e “love and support” y pa e curashi pa tuma e iniciativa di kier trece e mensahe di motivacion y curashi na e hobennan di tur e diferente scolnan secundario.
El a conclui bisando cu e ta compronde cu un persona den un posicion asina tur dia ta ricibi informacion di bon iniciativanan, y ta un responsabilidad pa scoge kico e lo scoge, kico e lo inverti den dje, ki ora “si” y ki ora “no”; y e ta sinti’e afortuna cu e oportunidad cu a keda brinda nan dje.
El a añadi pa e mandatario semper carga e responsabilidad ey cu henter su alma.